Ministru Administrasaun Estatál, Miguel Pereira de Carvalho. Imajen TATOLI/Egas Cristovão.

DILI, 19 abril 2021 (TATOLi)—Ministru Administrasaun Estatál (MAE), Miguel de Carvalho Pereira hateten, ohin, MAE simu ona dadus vítima afetadu inundasaun hosi munisípiu 12 inklui Rejiaun Administrativu Espesiál Oé-Cusse Ambeno (RAEOA) ho totál provizóriu hamutuk 21.889.

Notísia Relevante: Dadus provizóriu vítima afetadu inundasaun iha uma kain 11.000-resin

“Dadus família afetadu inundasaun, ita rejista ho forma rua. Dadus ida maihosi xefe aldeia no xefe suku sira ba família afetadu inundasaun nian to’o ohin loron, ho dadus provizóriu hosi territóriu Timor-Leste ho totál hamutuk 21.889,” Miguel de Carvalho Pereira hateten ba jornalista sira, hafoin asina dokumentu ba projetu “COVID-Resilient Elections in Timor-Leste” (CORE-TL), iha salaun VIP MAE, Colmera, Dili, segunda ne’e.

Hosi totál dadus hirak ne’e, foin bazea de’it ba lista formatu dahuluk nian kona-ba oinsá identifika númeru uma kain ne’ebé afetadu ba inundasaun, la inklui dadus sira hosi format daruak no datoluk nian kona-ba infraestrutura ne’ebé hetan estragu no sasán setór privadu sira-nian ne’ebé hetan estragu.

Maske lista ba formatu rua no tolu seidauk konklui hotu maibé Governu sei esforsu nafatin atu oinsá mak fó apoiu uluk ai-han bázika ba vítima sira, liuliu sira-ne’ebé mak hela iha sentru evakuasaun nian inklui balun ne’ebé hela ho viziñu sira.

Governante ne’e informa, vítima família afetadu inundasaun ne’ebé iha Dili hamutuk 12.981 ne’e, Governu liuhosi Sekretáriu Estadu Protesaun Sívil (SEPS) fó ona apoiu nesesidade bázika no to’o ohin loron SEPS fó apoiu ba ema liu rihun lima (5) no restu ne’e sei fahe iha semana ne’e nia laran.

“Faze daruak, ita sei fahe materiál konstrusaun ba afetadu sira maibé bazea ba komunidade nia uma ne’ebé aat totál, natoon no ladún aat, depois mak fó tuir ba estragu sira-ne’e,” nia dehan.

Daudaun ne’e, sentru evakuzaun sira-ne’ebé ativu iha Dili hamutuk 31 ho totál uma kain 15.876. Iha 16 abril liubá, ema abitante sira balun ne’ebé hela iha sentru evakuasaun hahú fila ona ba sira-nia uma no hirak ne’ebé sei hela metin iha sentru evakuasaun hamutuk 7.246.

Jornalista: Osória Marques

Editór: Cancio Ximenes  

PUBLISIDADEiklan

HAKEREK NO HATÁN

Please enter your comment!
Please enter your name here