Governu ho Parlamentu Nasionál debate Orsamentu Retifikativu iha faze Espesialidade, kuarta (21/04). Imajen Tatoli/Egas Cristóvão.

DILI, 21 abríl 2021 (TATOLI)—Reprezentante Povu iha uma fukun Parlamentu Nasionál (PN) deside ko’a orsamentu hosi Ministériu ba Asuntu Parlamentár no Komunikasaun Sosiál (MAPKOMS) ho montante millaun $1,7 atu reforsa fundu kontinjénsia.

Notísia Relevante: Orsamentu MAPKOMS aprovadu iha espesialidade  

Parlamentu Nasionál deside ko’a iha kategoria despeza kapitál dezenvolvimentu ho tipu programa 439 kona-ba garante liberdade espresaun no asesu informasaun. Iha programa ne’e dotasaun inisiál ho montante millaun $2,7, nune’e iha proposta-alterasaun deputadu sira ko’a millaun $1,7 no hela de’it millaun $1.

Hosi montante orsamentu millaun $1,7 ne’e prevee ba títulu dotasaun Governu tomak nian (dotações para todo governo) ho kategoria despeza bens no servisu, iha programa 148 kona-ba kontinjénsia.

Proponente ba proposta ne’e mai hosi Deputadu Cornélio Gama ‘L7’ hosi bankada PLP, Abel Pires hosi PLP no deputada Olinda Guterres hosi bankada KHUNTO.

Justifikasaun sumária hosi proponente sira ho razaun reforsa fundu kontinjénsia nune’e responde dezastre naturál hodi halo despeza ba efeitu hosi cheias (banjir) no inundasaun ne’ebé akontese iha loron 4 abríl liubá.

Iha proposta-alterasaun ba orsamentu MAPKOMS nian aprovadu ho rezultadu votasaun a-favór 42, kontra 10 no abstensaun 8.

“Nune’e orsamentu hosi MAPKOMS sofre redusaun pasa,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária, kuarta ne’e.

Entretantu proposta-alterasaun hosi Bankada CNRT husu atu ko’a osan hosi Gabinete Primeiru Ministru (GPM) no Gabinete Vise Primeiru-Ministru na’in-rua la pasa tanba ne’e orsamentu la sofre redusaun.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here