Imajen/Media PR.

DILI, 05 dezembru 2020 (TATOLI)—Orsamentu hosi Ministériu Asuntu Parlamentár no Komunikasaun Sosiál (MAPKOMS) ho montante millaun $9,930 aprovadu iha faze espesialidade.

Hafoin halo diskusaun, reprezentante povu aprova ho rezultadu votasaun a-favór 41, laiha kontra no abstensaun.

“Orsamentu ba Ministériu Asuntu Parlamentár no Komunikasaun pasa,” Prezidente Parlamentu Nasionál, Deputadu Aniceto Longuinhos Guterres Lopes, fó-sai liuhosi debate espesialidade loron daruak, plenária PN, sábadu ne’e.

Ministériu ba Asuntu Parlamentár no  Komunikasaun Sosiál lideradu Francisco Jerónimo, nu’udar departamentu governamentál responsável ba konsesaun, ezekusaun, koordenasaun no avaliasaun polítika, definida no aprovada liuhosi Konsellu Ministru reprezenta área komunikasaun sosiál no asuntu parlamentár.

Ministériu ba Asuntu Parlmentár no Komunikasaun Sosiál propoin millaun $9.930 ba tinan fiskál 2021, ne’ebé koloka ba saláriu no vensimentu rihun $ 866, bens no servisu millaun $ 2.736, transferénsia públika millaun $3.410, kapitál minór rihun $218 no kapitál dezenvolvimentu millaun $2.700.

Hosi millaun $ 9.930 ne’e koloka Gabinete ba Asuntu Parlamentár rihun $91, Gabinete Inspesaun rihun $35, Gabinete Ministru ba Asuntu Parlamentár no Komunikasaun rihun $782, Diresaun Jerál Administrasaun no Finansa millaun $5.835.

Nune’e mós Diresaun Nasionál Administrasaun no Finansa rihun $312, Diresaun Nasionál Aprovizionamentu no Lojístika rihun $95, Gabinete Sekretaria Estadu Komunikasaun Sosiál (SEKOMS) rihun $732, Diresaun Diseminasaun Informasaun rihun $825, Sentru Rádiu Komunitáriu sira rihun $600 no Sentru Formasaun no Téknika Komunikasaun rihun $624.

Medida prinsipál setoriál hosi MAPKOMS ba tinan fiskál 2021 mak kontinua asegura koordenasaun regulár ho Parlamentu Nasionál, propooin polítika no elabora lejizlasaun no halo regulamentasaun nesesária iha área komunikasaun sosiál.

Nune’e mós MAPKOMS ezerse superintendénsia no tutela órgaun komunikasaun sosiál Estadu nian no koordena diseminasaun informasaun kona-ba programa no asaun Governu nian.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here