Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu. Imajen TATOLI/Egas Cristovão

DILI, 21 abríl 2021 (TATOLI)–Governu liuhosi reuniaun Konsellu Ministru (KM) iha kuarta ne’e, delibera hodi propoin ba Prezidente Repúblika (PR), Francisco Guterres ‘Lú Olo’ hodi renova Estadu Emerjénsia (EE) ba da-XIII hodi evita risku kontájiu surtu COVID-19 maka’as liután iha Timor-Leste.

“Konsellu Ministru hala’o sorumutuk delibera ona atu propoin ba Prezidente Repúblika, atu renova Estadu Emerjénsia ba loron 30,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu iha Palásiu Governu, kuarta ne’e.

Notísia relevante: Prezidente Repúblika dekreta Estadu Emerjénsia ba dala-XII

Portavós Governu dehan, razaun Governu husu renovasaun EE tanba haree ba evolusaun situasaun epidemiolójika no proliferasaun kazu sira ne’ebé mak rejista ona hosi kontájiu COVID-19 no atu evita no neutraliza risku propagasaun SARS-CoV-2, atu nune’e bele proteje saúde públika no iha kbiit atu hatán ba Sistema Nasionál Saúde nian.

“Governu propoin ba Xefe Estadu katak ho renovasaun Estadu Emerjénsia, permite atu suspende ka limita direitu no garantia fundamentál balun,” governante ne’e akresenta.

Enkuantu, EE da-XII daudaun ne’e sei vigora hela no sei ramata iha oras 23:59 loron 02 maiu 2021.

Totál kazu rejistadu COVID-19 hahú marsu 2020 to’o agora hamutuk 1.452, kazu ativu hamutuk 725 no rekuperadu 731.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here