Prezidente Repúblika, Francisco Guterres "Lú-Olo". Imajen Tatoli/ Egas Cristovao

DILI, 01 abril 2021 (TATOLI)—Prezidente Repúblika, Francisco Guterres Lú Olo, horisehik (31 marsu 2021), dekreta Estadu Emerjénsia bad ala-XII ba loron loron tolu-nulu (30), hahú hosi tuku 00h00 iha  3 abril 2021 no termina iha tuku 23h59 iha 2 maiu 2021, iha territóriu nasionál tomak.

Notísia Relevante: PN autoriza Prezidente Repúblika dekreta Estadu Emerjénsia ba dala-XII

Tuir komunikadu imprensa ne’ebé Agência TATOLI asesu hateten, Prezidente Repúblika dekreta Estadu Emerjénsia hafoin pedidu estensaun aprova iha Parlamentu Nasionál ho votus-a favor 49, kontra 0 no abstensoins 14.

Antes ne’e, komunikadu ne’e haktuir, iha 29 marsu, Prezidente Repúblika rona uluk Konsellu Superior Defeza no Seguransa no Konsellu Estadu molok haruka pedidu autorizasaun ba Parlamentu Nasionál hodi deklara estensaun Estadu Emerjénsia ba dala-XII.

Governu hato’o pedidu estensaun ba Estadu Emerjénsia ba Prezidente Repúblika tanba haree númeru kazu rejistadu ho COVID -19 iha Timor-Leste aumenta hosi loron ida ba loron seluk.

Tuir dadus hosi Organizasan Mundiál Saúde (OMS), iha 23 marsu 2021, infesaun SARs-Cov-2 mundialmente rejista kazu konfirmadu hamutuk 123.216,178 no hamate ema hamutuk 2.714, 517 no tanba COVID-19.

Iha nasaun viziñu Indonézia,  rejista kazu  infesaun SARs-CoV-2 hamutuk  1.465,928 no hamate ona 39.711. Iha provinsia Nusa Tenggara Timur (NTT) ne’ebé baliza ho Timor-Leste, kazu konfirmadu hamutuk 12.012 no hamate ema na’in-327.

Dekretu Prezidente Repúblika, hanesan mós sira seluk, sei hasai parsialmente to’o agora, hodi deklara Estadu Emerjénsia, fó kbiit ba Governu bele foti medida hodi suspende direitu konstitusionál balun sidadaun sira-nian, inklui ba sirkulasaun internasional, sirkulasaun iha rai-laran, direitu ba reuniaun no manifestasaun, direitu ba kultu, direitu ba edukasaun, direitu ba propriedade no inisiativa ekonómika privada no direitu rezisténsia.

Medida sira ne’e foti, nu’udar medida prevensaun no kombate moras COVID-19 atu labele hada’et hosi ema ida ba ema seluk.

Governu impoin serka sanitaria no konfinamentu domisiliariu iha Munisípiu Dili, Baucau no Viqueque nu’udar medida atu hapara virus hada’et ba beibeik hosi ema ida ba ema seluk.

Prezidente Repúblika liuhosi Dekretu Prezidensiál husu Forsas Armadas Defeza Timor-Leste apoia Polísia Nasionál Timor-Leste no Departamentu Governamentál ne’ebé responsável ba saúde públika ba atividade nesesária ba fiskalizasaun no ezekusaun estadu emerjénsia.

Governu sei define medida implementasaun ba Estadu Emerjénsia ba dala-XII.

Husi fulan marsu 2020, bainhira rejista kazu pozitivu ida ho Covid-19, Timor-Leste implementa kedas Estadu Emerjénsia. Implementasaun Estadu Emerjénsia ho medida oioin, hanesan medida preventiva no kontrolu COVID-19 labele da’et ba populasaun mak permite ita seidauk iha transmisaun komunitária.

Iha loron 31 marsu 2021, Timor-Leste rejista kazu pozitivu na’in-415. Desde marsu 2020 to’o horisehik, hamutuk ema na’in-604 hetan infesaun hosi SARs-CoV-2, sira seluk rekuperadu no seidauk rejista ema mate. 

Jornalista: Osória Marques

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here