Primeiru-Ministru, Taur Matan Ruak, hamutuk ho membru Governu sira Partisipa iha debate orsamentu ratifikativu. iha sala plenária PN, tersa (20/04). Imajen TATOLI/Egas Cristóvão.

DILI, 20 abríl  2021(TATOLI)—Primeiru-Ministru (PM), Taur Matan Ruak, husu ba Deputadu sira iha Parlamentu Nasionál (PN) atu proposta iha orsamentu retifikativu atu rezolve  estragu infraestrutura kauza dezastre naturál.

“Governu preparadu loos no agardese ba pareser Komisaun C (Finansa Públika), Governu presiza apoia Parlamentu Nasionál tanba Governu labele mesak rezolve situasaun ida ho demisaun iha dezastre naturál no pandemia COVID-19,” PM Taur hateten ámbitu diskusaun jenerealidade orsamentu retifikativu iha sala plénaria PN, tersa ne’e.

Notísia relevante: Governu aprezenta Orsamentu Retifikativu millaun $223 ba PN

Proposta orsamentu la inklui ho kustu estragu dizastre naturál, tanba Governu submete proposta molok akontese inundasaun.

“Ita presiza rekursu ka kapitál tanba ami haruka orsamentu retivikativu atu reforsa fundu COVID-19 mak foin mosu dezastre naturál, ne’ebé ha’u sente katak momentu ne’e presiza asaun atu ita hakbiit ita-nia an hodi fó resposta di’ak liu ba ita hotu no ita-nia sidadaun,” nia subliña.

Dadus prelimináriu dezastre naturál, ne’ebé akontese iha domingu (04/04), hamate ema 41, família afetadu 21.676 no dezlokadu 7.246 iha fatin evakuasaun hamutuk 31, ne’ebé ho kustu estimasaun millaun $50 ba sidadaun sira nia saán no uma de’it.

Ba danu ka estragu infraestrutura Estadu, kustu esimasaun provizóriu millaun $168-resin, kompostu hosi ponte, estrada no moru ka barrajen.

Enkuantu, ba área eletrisidade kuaze lakon millaun $5, maibé presiza fundu milaun $7 atu rekupera tanba iha torre 16 mak ameansadu.

Infraestrutura distribuisaun bee-moos, estragu millaun $2,5 no presiza rekupera atu populasaun bele asesu bee.

“Ita hakarak halo rekuperasaun nia kustu provalvemente liu, tanba ita-nia ábitu iha tinan kotuk (2020) ita rekonstrui maibé udan mai sobu tan fali ho foun dala ida. Nune’e ita presiza halo planu integradu ida ho kustu kapitál millaun $225,” nia akresenta.

Ho situasaun kalamidade ne’e, PM dehan, obrigadu Governu halo estudu ba demesaun atu re-organiza-an hodi responde ho trasa polítika no estratéjia inklui planu di’ak atu mobiliza rekursu hodi halo rekuperasaun.

“Ha’u-nia pedidu Parlamentu Nasionál atu bele fó apoia tomak ba Governu atu ita rezolve situasaun sira ne’e tanba laiha partidu ida ne’ebé atu aproveita situasaun ida hodi benefisia-an,” nia hatutan.

Nune’e, PM Taur hakarak agaredese ba PN ne’ebé aprezenta ona opsaun ho Governu hodi buka solusaun ba dezastre naturál.

Entretantu, proposta Orsamentu Retifikativu liuhosi alterasaun Orsamentu Jerál Estadu (OJE) 2021 prevee millaun $51,9 ba traballadór liña frente no millaun $31 finaliza programa Cesta Bázika iha territóriu nasionál.

Tuir relatóriu no pareser hosi Komisaun C, totál orsamentu retifikativu hamutuk millaun $223,8 realoka verba hosi Fundu Infraestrutura ho valór millaun $62, realokasaun hosi verba Dotasaun Todo Governu ho montante millaun $26,5 no integrasaun saldu jerénsia ne’ebé la inskritu (não inscritos) iha OJE 2021 ho montante millaun 135,3.

Hosi montante orsamentu millaun $223,8, koloka ba kombate no halo prevensaun pandemia COVID-19 ho valór millaun $51,2, medida apoia sósiu-ekonómika millaun $81,7, finalizasaun pagamentu Cesta Bázika millaun $31, atribuisaun suplementu remuneratóriu ba traballadór liña frente millaun $51,9 no dotasaun kontinjénsia ba fundu COVID-19 millaun $8.

Nune’e, Prezidente Parlamentu Nasionál, Aniceto Guterres, hateten, meza PN loke ona ba Deputadu sira atu sumbete proposta aumentu orsamentu retifikativu atubele responde ba situasaun dezastre naturál iha Timor-Leste.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here