Ministru Asuntu Parlamentár no Komunikasaun Sosiál, Francisco Martins da Costa Pereira Jerónimo, entrega dokumentu Orsamentu Retifikativu ba Prezidente Parlamentu Nasionál, Deputadu Aniceto Longuinhos Guterres Lopes, tersa (30/03/2021) ne'e. Imajen/Mídia PN.

DILI, 30 marsu 2021 (TATOLI)—VIII Governu Konstitusionál lideradu Primeiru Ministru (PM) Taur Matan Ruak, tersa ne’e, aprezenta proposta Orsamentu Retifikativu (OR) ho montante millaun $223 ba Parlamentu Nasionál ho karáter urjénsia.

Notísia Relevante: PN hein Governu aprezenta Orsamentu Retifikadu

Hosi montante orsamentu millaun $223 ne’e foti hosi Fundu Infraestrutura millaun $60 no resta halo de’it ajustamentu ba orsamentu 2021 ne’ebé aprovadu no promulgadu.

Prezidente Parlamentu Nasionál, Deputadu Aniceto Guterres, simu proposta orsamentu retifikativu iha oras 16.30 hosi Ministru ba Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo.

“Orsamentu Retifikativu ne’e hamutuk millaun $223 ne’e aloka espesiál ba fundu COVID-19, foti hosi fundu infraestrututa millaun $60 hodi halo ajustamentu tanba fundu infraestrutura ne’e multi-anuál tanba seidauk ezekuta hotu. Entaun, ami foti hodi rezolve lai problema pandemia ne’e, tanba Governu hakarak fó solusaun ba situasaun atuál,” Ministru Francisco Martins da Costa Pereira Jerónimo informa liuhosi konferénsia imprensa, iha Parlamentu Nasionál.

Imajen/Mídia PN.

Nia hatutan, programa tetu ona ho programa hodi fó resposta ba sósiu-ekonómika iha rai-laran hanesan rezolve problema emprezáriu, estudante, liña frente sira no povu hotu iha aplikasaun serka sanitária no konfinamentu obrigatóriu ne’e, nune’e estabiliza situasaun ekonomia iha rai-laran.

Ministru Francisco Martins da Costa Pereira Jerónimo fó-sai katak orsamentu retifikativu ne’e laiha aumenta maibé ajusta de’it Orsamentu Jerál Estadu (OJE) 2021.

Nia argumenta, razaun Governu aprezenta orsamentu retifikativu ne’e tanba Timor-Leste oras ne’e kontinua luta hasoru propagasaun surtu COVID-19.

Iha fatin hanesan, Prezidente Parlamentu Nasionál, Deputadu Aniceto Longuinhos Guterres Lopes, esplika orsamentu retifikativu ne’e foka atu responde situasaun pandemia COVID-19 nune’e prevene moras ne’e labele fó impaktu ba sósiu-ekonómika iha rai-laran.

Nia dehan, hanesan bainbain laiha tramitasaun espesiál ba orsamentu retifikativu maibé tanba Governu husu ho karáter urjénsia.

“Parlamentu sei hala’o prosesu tuir tramitasaun (regra) rejimentál, tanba ne’e ami sei trata tuir karáter urjénsia. biar orsamentu retifikativu ne’e ninia durasaun lakleur hanesan Orsamentu Jerál Estadu baibain maibé orsamentu ne’e responde ba pandemia COVID-19,” nia dehan.

PPN hatutan, matéria hosi Orsamentu Retifikativu ne’e la barak, apenas halo transferénsia de’it hodi fó solusaun ba pandemia.

Tuir planu, ohin, Prezidente Parlamentu Nasionál sei haruka nota téknika ba asesór jurídika sira hodi haree proposta Governu nian.

“Posivelmente aban dadeer baixa kedas ba Komisaun C ne’ebé trata asuntu Finansa Públika hodi halo apresiasaun lalais ba pedidu karáter urjénsia ne’e,” nia fundamenta.

Entretantu Orsamentu Jerál Estadu (OJE) 2021 ne’ebé Parlamentu Nasionál aprova no Prezidente Repúblika promulga hamutuk biliaun $1.895 kompostu hosi saláriu no vensimentu millaun $239,26, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

Hosi montante orsamentu biliaun $1.895 ne’e iha trimestre dahuluk (janeiru, marsu abríl) ho persentajen ezekusaun atinje $20.5%.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here