Pesoál saúde hala’o konferénsia imprensa iha HNGV, tersa (20/04/21). Imajen Tatoli/Felicidade Ximenes.

DILI, 19 abríl 2021 (TATOLI)—Pesoál saúde iha Ospitál Nasionál Guido Valadares (HNGV sígla portugés) kompostu hosi médiku, emfermeiru no aliadu-sira, kondena asaun krime ne’ebé akontese iha kuarentena Polo, Covalima hasoru médiku ida hetan kanek to’o suku pontu rua.

Pesoál saúde-sira kondena asaun ne’e no konsidera katak, tuir loloos situasaun ne’e labele akontese, tanba oras ne’e daudaun médiku-sira nu’udár forsa liña frente ne’ebé luta hela kontra COVID-19.

Notísia relevante:Pasiente COVID-19 hakanek médiku ida iha kuarentena Polo

“Ami husu ba nai-ulun sira atu proteje pesoál liña frente hanesan médiku-sira ne’ebé hala’o kna’ar iha baze. Husu mós ba instituisaun PNTL, F-FDTL, autoridade lokál-sira atu foti medida sériu no rigorozu ba asaun violénsia ida-ne’e. Ami kondena makaas asaun ne’e,” Reprezentante médiku HNGV, Amentinho Fernandes,  hato’o liu hosi konferénsia imprensa iha HNGV, tersa ne’e.

Médiku ne’e mós agradese no enkoraja nafatin pesoál saúde-sira, maski simu tolok, trata no agresaun fízika hosi sosiedade, maibé sei la hamate espíritu atu serbí ba rai ida-ne’e.

Nia apela ba komunidade atu serbisu hamutuk ho pesoál saúde iha momentu difísil ida-ne’e, la’ós sai inimigu  maibé sai mahon ba médiku-sira, hodi hamutuk luta kontra virus ne’e.

Asaun solidariedade ida-ne’e inisiativa rasik hosi médiku-sira iha HNGV no la lori Asosiasaun Médiku Timor Leste (AMTL) nia-naran tanba hakarak atu enkoraja pesoál liña frente, ne’ebé hetan violasaun fízika.

Entretantu, iha 19 abríl, pasiente COVID-19 na’in-rua iha kuarentena Polo, Munisípiu Covalima, lakohi koopera ho ekipa médiku atu submete ba izolamentu, to’o hakanek médiku ida iha parte oin suku pontu rua.

Oras ne’e daudaun, pasiente na’in-rua ne’e kumpre hela regra vizilánsia iha izolamentu, bainhira pasa hosi COVID-19 sei kontinua responsabiliza atuasaun ne’ebé sira halo iha Polísia.

Jornlista: Felicidade Ximenes

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here