Diretór Ezekutivu FONGTIL, Daniel Santos do Carmo. Imajen Tatoli/Egas Cristovão

DILI, 20 abríl 2021 (TATOLI)-Diretór ezekutivu Forum Organizasaun Naun Governamentál Timor-Leste (FONGTIL), Daniel Santos do Carmo, husu ba sidadaun hotu iha Timor-Leste atu kolabora ho Governu liuhosi Ministériu Saúde (MS) bainhira pozitivu  COVID-19.

Notísia Relevante : Pasiente COVID-19 na’in-24 iha Ermera lakohi koopera

FONGTIL hato’o ninia hanoin sira-ne’e relasiona evakuasaun ba sidadaun ne’ebé tuir teste laboratóriu katak, pozitivu ba COVID-19 iha Munisípiu Manufahi no Covalima ne’ebé hamosu inkooperasaun entre ekipa evakuasaun hosi MS ho pasiente COVID-19. Nune’e mós kabe ba situasaun iha Munisípiu Ermera ne’ebé deskonfia sidadaun balu pozitivu COVID-19 maibé sira la koopera atu kumpre iha Sentru Izolamentu, Gleno.

“Apela ba sidadaun hotu-hotu iha Timor laran tomak kolabora ho Governu liuhosi Ministériu Saúde no Sentru Integradu Jestaun Krize (CIGC), katak bainhira ita no membru família ruma deteta pozitivu ba diagnoze COVID-19, tuir rezultadu ezame laboratóriu, maka tenke informa no aprezenta-an imediatamente ba parte saúde ka CIGC,” diretór FONGTIL, Daniel Santos do Carmo hateten liuhosi komunikadu imprensa ne’ebé Agência Tatoli asesu, tersa ne’e.

Tuir FONGTIL nia haree katak virus COVID-19 ne’e perigu ba sidadaun ho idade liu tinan 60 no ba sidadaun ne’ebé iha istória moras hanesan, tensaun aas, ran midar, azma no seluk tan.

FONGTIL husu ba Governu liuhosi Ministériu Saúde no CIGC, aplika sistema operasionál no maneira komunikasaun ho aproximasaun persuazivu bainhira evakua sidadaun ruma ne’ebé pozitivu ba COVID-19.

“Iha ne’e sujere ba Ministériu saúde bainhira atu evakua pasiente COVID-19 pesoál saúde tenke iha komunikasaun ne’ebé persuazivu, nune’e pasiente-sira bele koopera ho saúde ba izolamentu. Maibé bainhira komunikasaun ne’ebé ladi’ak sei perturba ka diskute-malu bele mós hamosu kazu violasaun direitu umanu hanesan agresaun fíziku ne’ebé foin lalais akontese iha Munisípiu Manufahi ona Covalima,” nia hatutan.

Diretór FONGTIL husu ba Lider Karizmátiku Kay Rara Xanana Gusmão ne’ebé halo deklarasaun iha momentu entrega mete isin Armindo Borges ba família katak eis Prezidente Repúblika ne’e sei apoiu Governu hodi halo sensibilizasaun ba komunidade iha Timor-Leste atu prevene transmisaun COVID-19.

Jornalista       : Arminda Fonseca

Editór             : Francisco Simões

 

PUBLISIDADEiklan

HAKEREK NO HATÁN

Please enter your comment!
Please enter your name here