Ministru Edukasaun, Juventude no Desportu, Armindo Maia. Imajen Tatoli/Egas Cristovão

DILI, 19 abríl 2021 (TATOLI) – Ministériu Edukasaun, Juventude no Desportu (MEJD) iha ona planu atu rekruta tan profesór na’in-975 atu bele prienxe númeru profesór ne’ebé hahú menus.

Notísia Relevante : MEJD distribui rezumu matéria primeiru periodu ba estudante 1.170

Ministru Edukasaun, Juventude no Desportu, Armindo Maia, informa nia parte sei aprezenta planu-ne’e ba Konsellu Ministru iha tempu besik hodi hetan deliberasaun.

“Profesór-sira barak maka tama ona vida reforma, barak mate, no balun rezigna-an, tan ne’e, ha’u sei aprezenta planu rekrutamentu profesór na’in-975 ne’e para husu apresiasaun hodi hetan deliberasaun hosi KM,” Ministru Armindo Maia informa ba jornalista-sira iha serimónia distribuisaun rezumu matéria ba estudante-sira ne’ebé hala’o iha Eskola Ensinu Báziku Filiál (EBF) Balibar, segunda ne’e.

Molok atu aprezenta ba KM, ekipa tékniku MEJD nian sei prepara uluk rekizitu   rekrutamentu-sira tanba atu hetan apresiasaun hosi KM, xave maka rekizitu no ekipa ne’ebé mak involve iha prosesu rekrutamentu ne’e.

Nia dehan, loloos prosesu preparasaun ba rekizitu rekrutamentu ba profesór na’in-975 ne’e remata kleur ona, tanba de’it kauza hosi pandemia COVID-19 ne’e mak impede servisu hotu atu lao ho normál.

Dadus profesór-sira iha territóriu Timor laran ne’ebé mak Ministériu Edukasaun update to’o ohin loron, purvolta ema na’in-16.618, enkuantu profesór-sira kontratadu na’in-5.000 no voluntáriu na’in-1.000.

Jornalista   : Tomé Amado

Editór         : Francisco Simões  

1 KOMENTÁRIU

HAKEREK NO HATÁN

Please enter your comment!
Please enter your name here