Logotipu Programa “Eskola Ba Uma”. Imajen/Espesiál.

DILI, 16 abríl 2021 (TATOLI)–Servisu Edukasaun Munisípiu Dili orienta ona diretór eskola hotu-hotu iha Dili-laran  atu fo hatene  ba sira-nia profesór-sira prepara rezumu matéria eskola nian fahe ba estudante sira atu lori ba estuda iha uma.

Diretór Servisu Edukasaun Munisípiu Dili, Duarte Bragansa, sesta ne’e, informa ba Agência Tatoli iha Comoro, Dili, katak tuir desizaun enkontru entre diretór eskola-sira iha Dili  laran ho Servisu Edukasaun Munisípiu Dili, deside ona para parte eskola-sira sei prepara rezumu matéria depois mak estudante sira sei ba foti iha ida-idak ninia eskola.

Nia dehan, Servisu Edukasaun Munisípiu Dili hola desizaun ne’e atu fasilita estudante-sira ne’ebé laiha telefone android no la iha televizaun iha uma, atu bele hetan matéria hodi estuda iha uma.

“Ba estudante hirak ne’ebé iha android atu bele partisipa iha programa Eskola ba Uma no bele asiste iha televizaun. Mas ba sira ne’ebé susar tebes bele hakat ba eskola foti rezumu matéria atu lori ba uma estuda,”  Duarte Bragansa hateten.

Hosi sorin seluk, Servisu Edukasaun Munisípiu Dili konsidera estudante sira iha área Makadade, Postu Administrativu Atauro ho  Bee-Sahen iha  Postu Administrativu Metinaro, Dili,  presiza tebes atu halo distribuisaun rezumu matéria para estudante-sira bele estuda iha uma.

Estudante-sira ne’e,  Duarte Bragansa, haktuir laiha duni kondisoens atu asesu internet tanba laiha rede internet no hela iha área izoladu, tanba ne’e, tenke fahe duni rezumu matéria ba sira estuda iha ida-idak nia uma de’it.

“Ami rona dirijente sira-nia preokupasaun, ami tau konsiderasaun tanba maioria estudante la asesu liña internet,” nia hateten.

Jornalista : Tomé Amado

Editór : Francisco Simões

HAKEREK NO HATÁN

Please enter your comment!
Please enter your name here