Bankada CNRT hala’o konferénsia imprensa iha sala Bankada CNRT. Imajen Tatoli/Evaristo Soares Martins.

DILI, 19 abríl 2021 (TATOLI)—Bankada Kongresu Nasionál Rekonstrusaun Timor (CNRT, sigla portugés) propoin ba governu atu sosa de’it vasina Pfize’s, tanba AstraZeneca ne’ebé agora daudaun Ministériu Saúde uza Nasaun lubun mak suspende ona.

“Nasaun Europea barak mak suspende uza vasina AstraZeneca ka limita ba ema ne’ebé nia idade liu ona 55 ka 60. Iha Inglaterra rasik, Governu rekomenda atu labele uza vasina AstraZeneca ba sidadaun ho 30 mai kraik”, Reprezentante Bankada CNRT, Deputada Virgínia Ana Belo, informa liuhosi konferénsia imprensa, iha sala Bankada CNRT, segunda ne’e.

Tuir rekomendasaun Organizasaun Saúde Mundiál, AstraZeneca vasina ne’ebé seguru ba ema ho idade 18 ba leten, tanba vasina ne’e sei aumenta ema-nian imunidade hodi kontra Covid-19.

Nasaun viziñu Austrália rasik iha loron 8 abríl 2021 rekomenda ba sidadaun ne’ebé iha tinan 50 mai kraik atu uza vasina Pfizer’s hosi Estadu Unida Amérika, la’ós uza vasina AstraZeneca.

Notísia relevante: Horta enkoraja sidadaun hotu simu vasina AstraZeneca

“Nasaun sira-ne’ebé hapara totál atu uza vasina AstraZeneca mak Kamerun, Dinamarka no Norwegia. Bankada CNRT konsidera faktu sira ne’e hotu hatudu AstraZeneca la’ós 100 porsentu seguru atu aplika, inklui ba Timor-Leste ne’ebé nia sidadaun maioria joven mak barak liu,” Deputada Virgínia hateten.

Bankada CNRT haktuir, dadus hosi sensu populasaun 2015 hatudu hosi totál populasaun millaun 1.2, sidadaun ne’ebé ho idade 60 ba leten iha de’it na’in 96,942, karik oras ne’e bele dehan por-volta 120,000.

Bankada CNRT preokupa liután bainhira OMS deklara atu nasaun ida bele hetan imunidade hasoru COVID-19 mak kada nasaun tenke aplika vasina ba 70% hosi nia sidadaun tomak.

“Problema ne’ebé Bankada CNRT haree mak ne’e, bazea ba sensu populasaun 2015 hatudu katak populasaun ho idade liu 60, ne’ebé elejivel atu simu vasina AstraZeneca mak iha de’it 8% hosi totál populasaun. Se nune’e, seráke vasina AstraZeneca mak solusaun ba Timor-Leste atu bele livre hosi COVID-19,” Bankada CNRT preokupa.

Bankada CNRT rekomenda ba Governu atu hasai osan hodi sosa vasina Pfizer’s ne’ebé bele aplika ba sidadaun ho kategoria idade hotu-hotu.

“Vasina Pfizer’s nia folin mak $20 enkuantu AstraZeneca nia folin maka $4 de’it maibé la seguru ba sidadaun Timor ne’ebé maioria joven no aloka osan hodi sosa vasina Pfizer’s ba 70% hosi totál sidadaun Timor-Leste, atu nune’e Timor-Leste mós bele livre hosi COVID-19. Laiha razaun ba Governu atu dehan laiha osan tanba povu Timor-Leste tomak hatene katak Parlamentu Nasionál aprova ona osan Biliaun 1.895 ba Orsamentu Jerál Estadu 2021,” Bankada CNRT hateten.

Iha konferénsia imprensa ne’e partisipa hosi Xefe Bankada CNRT, Duarte Nunes, Arão Noé de Jesus da Costa Amaral no Deputada Carmelita Caetano Moniz.

Notísia relevante: Funsionáriu PN-deputadu sira simu vasina Astrazeneca

Jornalista       : Evaristo Soares Martins

Editór             : Cancio Ximenes

HAKEREK NO HATÁN

Please enter your comment!
Please enter your name here