Doutór sira hatudu vasina AstraZeneca iha lansamentu vasina dahuluk iha Sentru Saúde Bairro Formosa.kuarta (07/04). Imajen TATOLI/António Gonçalves

DILI, 07 abríl 2021 (TATOLI)–Eis Prezidente Repúblika no Premiadu Nobél da Páz, José Ramos Horta, enkoraja sidadaun hotu atu labele dúvida simu vasina AstraZenaca tanba seguru no di’ak ba imunidade atu prevene COVID-19.

“Ha’u hateten ba populasaun tomak katak bainhira Governu hahú vasinansaun, ita buka atu hotu-hotu simu, nune’e bele proteje-an hosi COVID-19, ” Horta hateten hafoin simu vasina faze dahuluk hamutuk ho membru órgaun soberanu sira, iha Sentru Saúde Bairro Formosa, Dili, kuarta ne’e.

Notísia Relevante: PM Taur simu ona vasina dahuluk

Nia husu ba sidadaun sira atu rona informasaun kona-ba vasina hosi fontes kredível la’ós informasaun buatu hosi individu ka grupu irresponsável sira.

“Ha’u husu populasaun tomak atu rona líder nasaun no Organizasaun Mundiál Saúde inklui médiku, lalika rona matenek sira iha Facebook tanba iha mundu ne’e hotu-hotu simu vasina ne’e. Tanba ita haree Maun Xanana Gusmão de’it mós preokupa loos ba COVID-19,” nia akresenta.

Horta haktuir, nia parte koa’lia ona ho ema barak iha nasaun seluk no kolega timor-oan balun iha Inglatera, kuaze millaun 30 mak simu ona vasina maibé di’ak hela.

“Ami ohin simu vasina ne’e ba simu doses daruak iha 08 jullu tanba vasina daruak mak bele hateten nia imunidade bele aumenta to’o 90%,” nia akresenta.

Biban ne’e, nia apela mós ba populasaun, maski simu ona vasina maibé tenke kontinua matein medida prevensaun hanesan uza máskara, fase liman bebeik no asegura distansiamentu sosiál.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here