Vasina AstraZeneca, Imajen TATOLI/António Gonçalves

DILI, 18 abríl 2021 (TATOLI)—Sala Situasaun Sentru Integradu Jestaun Krize (SIJK), rejista kazu foun 70 ne’ebé detetau iha Munisípiu Dili hamutuk 65, munisípiu seluk hamutuk lima, kazu rekoperadu na’in 21 no ativu 641.

“Totál kazu konfirmadu kumulativu sura hosi 2020, hamutuk 1.306. Kazu detetatu foun hamutuk 70. Hosi totál kazu detetadu foun ohin, mane 46, feto 24, asintomátiku 64 (91,4%), sintomátiku haat,” Koordenadór Forsa-Tarefa ba Prevensaun no Mitigasaun, Rui Maria de Araújo, hato’o liu hosi konferénsia imprensa iha Centro Convenções Dili (CCD), domingu ne’e.

Notísia relevante:COVID-19: kazu foun 43, rekoperadu 20 no totál ativu 592

Hosi totál kazu detetadu foun ohin, 54 (77%) mak deteta tanba halo teste ho razaun atu halo viajen ka halo ona viajen ba Munisípiu, hafoin deteta pozitivu.

Maski nune’e, sira ne’ebé rezultadu teste pozitivu, sira-nia hela fatin, iha Dili, iha duni cluster sira ne’ebé iha kazu detetadu barak.

Hosi horisehik mai ohin, hamutuk hotu Laboratóriu Nasionál Saúde halo  testes PCR 983, ho detalla hanesan tuir mai, Vijilánsia sentinela 18, Rastreiu ba kontaktu ka Contact tracing, 17, Rastreiu Aleatoriu ka Random Screening 362, Viajen sai hosi serka sanitária Munisipiu Dili 566 no Viajen internasionál 20.

Iha kazu detetadu sintomátiku lijeiru balun, oras ne’e iha fatin izolamentu, mak keixa hanesan parte hosi síntoma, susar ka labele atu horon morin ka dois. Ida ne’e, parte hosi síntoma COVID-19.

SIJK husu favór labele pániku, tanba maioria ema ne’ebé hetan síntoma hanesan ne’e, sei rekopera fali ninia kapasidade atu horon sasan.

Kazu grave ne’ebé iha Vera Cruz, nafatin uza ventiladór no aimoruk balun tuir protokolu ne’ebé Timor-Leste adopta.

SIJK apela ba populasaun iha Timor-Leste laran tomak, favór respeita nafatin regra prevensaun no ijiéne individuál, ne’ebé Governu hatu’ur ona atu prevene moras COVID-19 da’et ba mai.

Jornalista: Evaristo Soares Martins

Editór: Cipriano Colo

HAKEREK NO HATÁN

Please enter your comment!
Please enter your name here