Ilustrasaun COVID-19. Imajen/Espesiál

DILI, 17 abríl 2021 (TATOLI)—Sala Situasaun-Sentru Integradu Jestaun Krize (CIGC, sigla portugés) rejista kazu foun pozitivu COVID-19 hamutuk na’in-43, rekuperadu 20 no totál ativu hamutuk 592 mak daudaun iha sentru izolamentu.

“Kazu detetatu foun 43, hosi Dili 31 no munisípiu seluk 12. Hosi detetadu foun, mane 22 no feto 21,  ne’ebé na’in 43 ne’e asintomátiku hotu,” Koordenadór Forsa-Tarefa Prevensaun no Mitigasaun, Rui Maria de Araújo, relata liuhosi nota komunikadu ne’ebé Agência TATOLI asesu, sábadu ne’e.

Hosi totál kazu detetadu foun ohin, 41 (95%) mak deteta tanba halo teste ho razaun atu halo viajen ka halo ona viajen bá munisípiu.

Kazu detetadu iha Dili agrupa iha cluster 23, ne’ebé kazu foun 31 ohin hosi Dili, kompostu hosi clustrer iha Madohi 10, Comoro neen, Fatuhada neen, Bairro Pité tolu, no Becora, Colmera, Metiaut, Vila-verde, Taibesi, Caicoli (deteta kazu ida ho totál neen).

Enkuantu, evolusan kazu iha munisípiu ne’ebé deteta hosi horiseik no ohin, Manatuto rua, Ermera neen, Covalima tolu, Bobonaro ida, no munisípiu seluk inklui Rejiaun Administrativa Espesiál Oé-cusse Ambeno (RAEOA) la detata kazu foun.

Nune’e, kazu COVID-19 rejistadu iha Timor-Leste hahú marsu 2020 to’o 17 abríl hamutuk 1.236.

Iha kazu detetadu sintomátiku lijeiru balun, oras ne’e iha fatin izolamentu no keixa hanesan parte hosi sintoma susar ka labele atu horon morin ka dois.

“Ida-ne’e parte hosi sintoma COVID-19. Favór labele pániku, tanba maioria ema ne’ebé hetan sintoma hanesan ne’e, sei rekpera fali ninia kapasidade atu horon sasán,” Rui Maria de Araújo apela.

Iha izolamentu Vera Cruz, ohin loron, iha kazu pozitivu na’in-haat no ida grave, na’in-tolu moderadu.

“Hosi kazu pozitivu na’in-haat ne’ebé horiseik relata halo hela tratamentu iha obstetrisia no ohin kontinua sira-nia izolamentu iha fatin izolamentu ba kazu lijeiru sira,” nia hatutan.

Kazu grave ne’ebé iha sentru izolamentu Vera Cruz, nafatin uza ventiladór no ai-moruk balun tuir protokolu ne’ebé Timor-Leste adopta.

Hosi horisehik to’o ohin, Laboratóriu Nasionál Saúde (LABNAS) halo teste hamutuk 1.059, kompostu hosi vijilánsia sentinela 25, rastreiu ba kontaktu ka contact tracing 65, rastreiu aleatoriu ka random screening 159, viajen sai hosi serka sanitária munisípiu Dili 759, Viajen internasionál 23,  follow up iha kuarentena 28.

Aleinde ne’e, totál pedidu autorizasaun esesionál atu sai hosi serka sanitária iha munisípiu Dili iha 17 abríl hamutuk 242.

“Sekretariadu CIGC responde hotu kedan, maibé pedidu ida la prienxe kritériu tuir Rezolusaun Governu kona-ba Serka Sanitária iha munisípiu Dili,” Koordenadór Forsa-Tarefa esplika.

Jornalista: Arminda Fonseca

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here