Inundasaun iha Tasi-tolu, Dili, domingu (04/04/21). Imajen Tatoli/António Gonçalves.

DILI, 16 abríl 2021 (TATOLI)—Sekretária Estadu Protesaun Sivíl (SEPS), distribui ona apoiu emerjénsia ba família hamutuk 2.000 iha Munisípiu Dili, ne’ebé afetadu ba dezastre naturál, iha 04 abríl tinan ne’e.

Apoiu emerjénsia ne’ebé SEPS fó ba família afetadu-sira mak hanesan foos, ikan-lata (sardina), mina bimoli, susu-ben, super mie, sasán kuziña ho seluk tan.

Notísia relevante:SEPS transporta apoiu emerjénsia ba Munisípiu lima

“Ita identifika família hamutuk 8.000-resin iha Dili atu fó apoiu emerjénsia. To’o horisehik, ita fó ona ba família 2.000. Tanba ne’e, agora ita kontinua distribui ba família-sira ne’ebé seidauk hetan,’’ SEPS, Joaquim José Gusmão dos Reis Martins, hateten ba jornalista Agência Tatoli, iha kna’ar fatin Caicoli, Dili, sesta ne’e.

Joaquim Gusmão garante katak, distribuisaun apoiu emerjénsia sei to’o duni ba família hotu ne’ebé afetadu, iha semana oin.

SEPS mós rekoñese rekursu limitadu, tanba ne’e labele distribui sasán dala-ida ba suku hotu-hotu, maibé esforsu nafatin hodi bele distribui to’o família hotu.

Kona-bá apoiu ba munisípiu-sira, nia dehan, pontu fokál-sira kontinua fó apoiu no munisípiu-sira ne’ebé sasán estok iha armajén menus, hosi parte nasionál hahú distribui ona sasán hodi bele reforsa stoke.

SEPS mós estabelese ona sentru operasaun jestaun risku dezastre, hodi halo koordenasaun serbisu-sira ho efikás no efisiénsia, atu bele halo atuasaun emerjénsia iha terenu ho di’ak liu tan.

Iha atuasaun loron dahuluk hafoin dezastre naturál, SEPS foku liu ba primeiru sokoru hodi salva sidadaun-sira liu-liu labarik, inan isin-rua, ferik ho katuas-sira inklui ema vulnerável-sira, evakua ba sentru evakuasaun.

Tuir dadús ofisiál hosi Governu liu hosi SEPS no Ministéiru Administrasaun Estatál (MAE), iha família 25.000-resin mak hetan impaktu hosi dezastre naturál no hela fatin 4.546 mak a’at.

To’o 14 abríl, iha Dili ema na’in 11.104 mak hela iha sentru evakuasaun ativu hamutuk 38, hosi família hamutuk 8.548 ne’ebé afetadu hosi inundasaun.

Nune’e mós iha nívél infraetrutura públika-sira, iha estrada hamutuk 22 no ponte 11 mak hetan estragu.

SEPS rejista mós ema na’in 35 mak lakon vida durante dezastre naturál, hosi númeru ne’e na’in-10 mak seida’uk hetan.

Hosi na’in-35 ne’e, na’in-20 iha Dili, Ainaro na’in-neen, Viqueque na’in-tolu, Covalima na’in-rua, Manatuto na’in-rua, Aileu na’in-ida no Baucau na’in-ida.

Jornalista: Nelson de Sousa

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here