Foos ne’ebé Governu prepara ba família afetadu dezastre naturál iha Lagoa Tasi-tolu (11/04). Imajen TATOLI/António Gonçalves

DILI, 15 abríl 2021 (TATOLI)—Sekretária Estadu Protesaun Sivíl (SEPS), transporta ona apoiu emerjénsia ba munisípiu lima hanesan, Viqueque, Liquiça, Manatuto, Ermera no Aileu, hodi bele distribui ba família afetadu dezastre naturál.

“Ita hetan ona lisensa hosi Sentru Integadu Jestaun Krize (SIJK), komesa ohin haruka ona apoiu emerjénsia ba munisípiu-sira ne’e,’’ SEPS, Joaquim José Gusmão dos Reis Martins, informa ba jornalista Agência Tatoli, iha kna’ar fatin Caicoli, Dili, kinta ne’e.

Notísia relevante:SEPS-MAE halo levantamentu ba uma estragu tanba inundasaun

Antes ne’e, Diretór Nasionál Diresaun Jestaun Risku Dezastre, Agostinho Cosme Belo, hateten Munisípiu-sira ne’e estok armajén menus ona, tanba ne’e presiza distribui hosi nasionál, atu bele responde família afetadu-sira.

Sasán apoiu emerjénsia ne’e mak hanesan foos, super mie, mina bimoli, ikan lata (sardiña), susu-been, biskoit ho sasán koziña-nian.

Tuir dadus, Munisípiu Viqueque iha família 300 mak afetadu ba dezastre naturál no presija duni apoiu, Liquiça 100, Manatuto 350, Ermera 350 no Aileu 500.

Iha fulan janeiru tinan ne’e, Sentru Lojístika Nasionál (CLN-siglá portugés), aloka foos tonelada rihun 10 ba SEPS, ne’ebé utiliza hodi atende vítima dezastre naturál to’o ohin loron.

“Estok sufiente hodi bele responde família afetadu-sira,’’ nia dehan.

Tuir dadus ofisiál hosi Governu liu hosi SEPS ho Ministéiru Administrasaun Estatál (MAE), iha família 25.000 mak afetadu ba inundasaun no uma 4.546 mak a’at durante dezastre naturál.

To’o 11 abríl, Governu apoiu ona família hamutuk 1.396, no iha mós planu atu fahe ba vítima sira seluk  to’o loron 18 abríl .

Iha nível infraestrutura públika, estrada 22 no ponte 11 mak estragadu, iha Dili ema na’in 11.104 mak hela iha sentru evakuasaun ativu hamutuk 38 hosi totál família hamutuk 8.548 ne’ebé afetadu.

Hosi levantamentu dadus ne’e, rejista mós ema hamutuk na’in-35 mak lakon vida durante dezastre naturál iha loron 04 abríl, na’in-10 mak seida’uk hetan.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here