Vítima inundasaun balun iha Tibar. Imajen Tatoli/Hortencio Sanchez

LIQUIÇA, 16 abríl 2021 (TATOLI) – Koordenadór Levantamentu Dadus ba Família Afetadu Dezastre Naturaís, Ministériu Solidariedade, Sosiál no Inkluzaun (MSSI) Munisípiu Liquiça,  Dionísio de Jesus da Costa, informa sira-nia parte submete ona uma-kain 218 ne’ebé sai vítima inundasaun ba nasionál.

Koordenadór Levantamentu Dadus ba Família Afetadu Dezastre Naturaís MSSI Munisípiu Liquiça, Dionísio de Jesus da Costa. Imajen Tatoli/Hortencio Sanchez

“Iha Liquiça, suku-rua; Ulmera ho Tibar de’it mak família uma-kain 218 hetan dezastre hosi inundasaun. Dadus sira-ne’e ami submete ona ba nasionál,” Dionísio de Jesus da Costa, informa ba Agência Tatoli iha Liquiça, sesta ne’e.

Notísia Relevante : Mota sobu uma tolu no estraga ai-horis iha Ulmera

Hosi total uma-kain 218 ne’e kompostu hosi membru família 979; mane 515 no feto 464. Hosi númeru hirak-ne’e, labarik ho idade 0-5 hamutuk 237; feto 123 no  mane 114.

Labarik ho idade 6-17 hamutuk 285; feto 141 ho mane 144.  Inan isin-rua hamutuk 23 no inan ne’ebé foin partu ka fó hela susu ba labarik hamutuk 70. Ema ne’ebé ho  defisiente hamutuk 15; feto na’in-hitu no mane na’in-ualu. Nune’e idózus hamutuk 29 kompostu hosi  feto 16 no  mane 13.

“Inundasaun ne’e mós rezulta abitante mane ida ho idade 60 lakon vida,” Dionísio de Jesus da Costa hateten.

Dadus kona-ba estragu nian kompostu hosi  Suku Ulmera uma-kain hamutuk lima mak estraga total no membru família hamutuk 24

“Família-sira iha Suku Ulmera nian kompostu hosi Aldeia tolu mak hanesan Tetisari, Libaloa no Mane-muno. Hosi Suku Tibar ninian aldeia ne’ebé afeta ba dezastre ne’e mak, Mausoi, Fatunia, Bee-duku, Turleu no Lilbaulelo,” Dionísio informa.

Antes ne’e, MSSI Liquiça responde ona ajudu emerjénsia hanesan foos no supermi liuhosi Madre no Padre sira iha Koléjiu Santo Inácio de Loiola no Instituto São João de Brito Casait hodi te’in kada loron oferese ba família vítima hirak ne’e.

Cruz Vermella Timor – Leste (CVTL-sigla Portugés) ajuda mós material nesesidade báziku hanesan roupa, sanan, biti no seluk tan ba família hamutuk 67 resin iha Tibar.

Notísia Relevante : Uma 100-resin iha Tibar hetan estragus

Jornalista  : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here