Vítima inundasaun balun iha Tibar. Imajen Tatoli/Hortencio Sanchez

LIQUIÇA, 05 abríl 2021 (TATOLI) -Uma 100-resin iha Tibar, Postu Administrativu Bazartete, Munisípiu Liquiça, hetan estragus iha inundasaun, domingu (04/04).

Notísia Relevante : Dezastre naturál iha TL, ema 21 lakon vida

Administradór Postu Administrativu  Bazartete, João Nascimento Braz, informa dadus provizóriu ne’ebé nia simu hosi autoridade lokál iha Tibar katak uma 100-resin mak hetan estragus hosi inundasaun.

“Autoridade lokál sira kontinua halo levantamentu ba uma-kain sira ne’ebé hetan dezastre naturál ne’e,” João Nascimento Braz informa ba  Agência Tatoli iha Liquiça, segunda ne’e.

Nia hato’o ona asuntu ne’e ba Administradór Munisípiu Liquiça ho parte kompetente sira iha Liquiça hodi fó ajudu emerjénsia tuir kbiit ne’ebé munisípiu iha.

Komunidade balun nia sasán hanesan motór ho karreta mós hetan estragus no Tibar nia abitante ida mós mate iha parte Bee-duku nian iha Aldeia Fatunia ne’ebé pertensia ba Tibar. Vítima nee mate tanba rai maka monu taka metin.

Jonzinho Exposto, nu’udar vítima inundasaun iha Tibar hateten, nia sasán uma-laran nian la iha ida maka bele salva tanba bee tama uma laran hodi borus sai to’o li’ur.

“Ha’u nia sasán uma-laran laiha ida mak salva. Ha’u so salva mak ha’u nia ferik-oan ho ha’u nia oan ne’ebé foin moris fulan-rua. Ha’u evakua ona sira ba viziñu sira. Ha’u nia karreta rua no motór lima rai hakoi hotu,”  Jonzinho hateten.

“Ami toba dukur sente ba bee tama hanesan mota xoke monu moru kompañia Sra. Claricya Lay nian mak bee halo monu eletrisidade riin kona uma mak ha’u lori sai de’it mak ha’u nia fen ho oan, buat seluk dodok hotu la salva,” nia hatutan.

Iha sorin seluk vítima ne’ebé nia uma sofre ba inundasaun, José Pereira hateten, nia mós sasán uma-laran la hetan salvasaun hosi inundasaun ne’e.

“Maun-sira bele haree direita ami nia sasán mak sai hotu iha li’ur ne’e, bee mak  nakonu hotu iha uma-laran sai to’o mai li’ur,” José Pereira hateten.

Tuir observasaun ne’ebé iha kuaze besi riin eletrisidade nian iha Tibar monu hotu, inklui kontadór no komunidade nia sasán hanesan kioske barak mak bee no tahu tama estraga totál.

Jornalista   : Hortencio Sanchez

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here