Família matebian Francisca Gama, akompaña hosi dook prosesu haloot mate-isin, tersa (06/04). Imajen Tatoli/Joanico de Araújo.

DILI, 15 abríl 2021 (TATOLI)Primeiru-Ministru (PM), Taur Matan Ruak, husu deskulpa ba família  kazu óbitu (mate) ba COVID-19 dahuluk iha Timor-Leste, ne’ebé koopera ona tuir prosesu haloot ho protokolu saúde iha simitériu ne’ebé lokaliza iha postu administrativu Metinaro, munisípiu Dili.

“Ha’u hanesan Primeiru-Ministru no mós Xefe ba Sala Situasaun, husu deskulpa ba família matebian ne’ebé hakoi uluk, balun dehan hakoi ladún di’ak no laiha dignidade. Ba ida-ne’e ha’u husu deskulpa ba família, maibé ha’u mós husu kompreensaun atu tau ema barak nia saúde em primeiro lugar,” PM Taur hateten, hafoin ramata reuniaun semanál ho Prezidente Repúblika iha Palásiu Prezidensiál, Bairro Pité, kinta ne’e.

Notísia relevante: Mate-isin pasiente COVID-19 haloot ona, liu loron-10 família bele vizita

Ba kestaun ne’e, Xefe Governu rekoñese, tanba tuir protokolu ho rigór, prosesu funebre ladún tuir prosesu normál, maibé husu kompreensaun hosi família matebian tanba ekipa forsa-tarefa hosi Sala Situasaun-Sentru Integradu Jestaun Krize (CIGC, sigla portugés) fó importánsia ba saúde públika hodi kombate perigu vírus SARS-Cov-2.

Entretantu, mate-isin pasiente COVID-19 ho naran Francisca Gama nu’udar timor-oan ho idade 44, hakotu iis iha tersa (06/04) dadeer iha sala izolamentu Ospitál Lahane no haloot iha loron 06 abríl hanesan ema dahuluk iha Timor-Leste ne’ebé mate tanba COVID-19.

Tanba ne’e, ekipa haloot iha simitériu Metinaro, ne’ebé hanesan fatin espesífiku ba pasiente óbitu COVID-19.

Iha prosesu funebre, família bele akompaña maibé hosi dook no labele kari aifunan no sunu lilin.

Foin autoriza família ba vizita no kari aifunan hafoin liu loron sanulu haloot mate-isin

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here