Ekipa treinadu hosi MS, hiit hela mate-isin ne’ebé mate tanba COVID-19, hodi ba haloot iha Metinaro, tersa (06/04). Imajen TATOLI/Joanico de Araújo.

DILI, 06 abríl 2021 (TATOLI)—Sala Situasaun-Sentru Integradu Jestaun Krize (CIGC, sigla portugés) no ekipa Ministériu Saúde (MS) haloot ona mate-isin ne’ebé mate tanba moras COVID-19 iha tersa ne’e.

“Hato’o deskulpa boot ba família tanba regra COVID-19 obriga ekipa sira haloot mate-isin tuir regra ne’ebé estabelese hosi Organizasaun Mundiál Saúde (OMS) no Ministériu Saúde. Tanba ne’e, husu ba família matebian atu kontinua nafatin koopera ho Sala Situasaun hodi labele ba vizita lai matebian nia rate, bele vizita bainhira liu ona loron-10, hodi lori aifunan ba kari, sunu lilin no halo tuir kultura no lisan,” Koordenadór ba destakamentu reasaun rápida Sala Situasaun GCIG, Aurélio Guterres, hateten hafoin haloot pasiente COVID-19 iha semitériu Metinaro, tersa ne’e.

Notísia relevante: COVID-19: Ema na’in 27 preparadu haloot mate-isin

Pasiente Francisca Gama nu’udar sidadaun timor-oan ho idade 44, hakotu iis iha tersa (06/04) dadeer iha sala izolamentu Ospitál Lahane, konsidera hanesan ema dahuluk iha Timor-Leste ne’ebé mate tanba COVID-19.

Ekipa Forsa-Tarefa COVID-19 haloot mate-isin pasiente COVID-19 iha Metinaro, tersa (06/04). Imajen TATOLI/Joanico de Araújo

Nune’e, ekipa saúde trasporta ba semitériu ne’ebé lokaliza iha postu administrativu Metinaro, munisípiu Dili ho karreta funeráriu hosi Ministériu Solidariedade Sosiál no Inkluzaun (MSSI).

Durante movimentu hosi sala izolamentu, hetan akompañamentu másima hosi ofisiál CIGC no ekipa Polísia Nasionál Timor-Leste (PNTL) hosi Unidade Tránzitu.

Família matebian Francisca Gama akompaña prosesu funebre mate-isin hosi dook, iha Matinaro, tersa (06/04). Imajen TATOLI/Antónia Gusmão

To’o iha semitériu Metinaro molok haloot mate-isin, Padre Angêlo Sansinha prezide uluk orasaun no fó bensaun ba semitériu refere.

Koordenadór Aurélio Guterres, lori Governu nia naran hato’o sentidu kondolénsia ba família Ximenes-Gama ne’ebé mak lakon sira-nia maluk.

“Hato’o sentidu konsolénsia ba família tanba lakon sira-nia ema no lori mai deskansa ikus iha semitériu foun Metinaro,” nia tenik.

Aleinde ne’e, Reprezentante CIGC ne’e agradese ba Padre Sansinha ne’ebé durante ne’e fó apoiu tomak no ikus liu prezide orasaun molok haloot matebian.

Nia parte agradese mós ba pilár hotu hosi MS, administrasaun postu administrativu Metinaro inklui ministériu relavante sira.

Iha seremónia funebre ne’e, matebian nia kaben no oan-mane ne’ebé infetadu COVID-19 inklui família balun akompaña hosi dook.

Família matebian Francisca Gama akompaña prosesu funebre mate-isin hosi dook, iha Matinaro, tersa (06/04). Imajen TATOLI/Antónia Gusmão

Iha fatin hanesan, reprezentante Família Matebian, Roberto José, hato’o agradesementu ba Padre Angêlo Sansinha tanba prizide ona orasaun ba sira ninia maluk matebian.

“Agradese ba ekipa tomák ne’ebé haloot ona ami nia-inan, alin, feton no oan Francisca Gama. Ami laiha buat ida atu hato’o tanba ida-ne’e mak dalan moris ida-idak ninia, ita-nia vida mak hanesan ne’e, balun bele mate tanba moras, ami-nia alin mate tanba COVID-19 maibé antes nia infetadu COVID-19, nia iha ona moras ne’ebé komplikadu tebes,” Roberto José espresa ho laran triste.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here