FFTL konvoka reuniaun ho treinadór prinsipál-sira. Imajen/FFTL

DILI, 15 abríl 2021 (TATOLI) – Federasaun Futeból Timor-Leste (FFTL) liuhosi Diretór Téknika, Fábio Maciel,  kinta ne’e, konvoka reuniaun ho treinadór prinsipál-sira hodi diskute dezenvolvimentu futeból iha Timor-Leste tuir padraun International Federation of Association Football  (FIFA) nian.

Sorumutuk ne’e atu halibur mós idea estratéjika-sira hosi treinadór-sira kona-ba oinsá dezenvolve jogadór juveníl no ekipa nasionál, inklui estabelese akademia futeból iha Dili no mós iha munisipiu-sira.

Notísia Relevante : FFTL kontaktu FIFA halo jogu amigavél ho nasaun sira iha ASEAN

“Ita labele hanoin iha Dili de’it, maibé husu treinadór-sira atu partilla mós hanoin oinsá ita bele dezenvolve futeból iha Timor-Leste tomak,” Fábio hateten liuhosi komunikadu imprensa hosi FFTL ne’ebé Agência Tatoli asesu.

FIFA  rasik ezije  ba FFTL atu iha futuru tenke iha pelumenus 13 Akademia Futeból hodi dezenvolve futeból iha Timor-Leste. Tanba ne’e, Fábio apela oinsá atu haree posibilidade ne’ebé eziste bazeia ba kondisaun real ne’ebé iha, hodi hahú daudaun dezenvolve futeból iha Timor-Leste.

Iha parte seluk projetu konstrusaun Kampu Demokrasia tama ona iha prosesu no FIFA informa katak sei bele hahú iha jullu 2021. Hosi Kampu ida-ne’e bele utiliza ba treinamentu no mós kompetisaun-sira hodi selesiona jogadór di’ak-sira ba ekipa nasionál.

Fábio Maciel oras ne’e hala’o kna’ar nu’udar diretór téknika no mós treinadór prinsipál ba ekipa nasionál senior Timor – Leste nian.

Jornalista   : Hortencio Sanchez

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here