Líder istóriku, Kay Rala Xanana Gusmão. Imajen TATOLI/Egas Cristóvão

DILI, 14 abríl 2021 (TATOLI)—Líder istóriku, Kay Rala Xanana Gusmão, hamutuk ho família matebian Armindo Borges, halo limpeza iha areadór sentru izolamentu Vera Cruz.

Ohin loron tama ona loron datoluk Xanana Gusmão hamutuk ho família matebian hein iha sentru izolamentu tanba seidauk iha solusaun entre família no ekipa forsa-tarefa Sala Situasan-Sentru Integradu Jestaun Krize (CIGC, sigla portugés) hamutuk ho Ministériu Saúde (MS) atu haloot mate-isin.

“Ita hamoos fo’er sira ne’ebé soe iha fatin ne’e,”Líder karizmátiku ne’e konvida partisipante asaun solidaridade ba nia, ne’ebé iha areadór sentru izolamentu Vera Cruz, Caicoli, kuarta kalan ne’e.

Notísia relevante: Desizaun hasai mate-isin Armindo Borges hein KM

Daudaun ne’e, Xanana Gusmão hamutuk ho família matebian kontinua hein desizaun Governu liuhosi enkontru Konsellu Ministru atu deside entrega mate-isin ba família.

Tuir observasaun Agência TATOLI iha terrenu, nota katak situasaun la’o hakmatek tanba hetan seguransa másimu hosi Polísia Nasionál Timor-Leste (PNTL).

Armindo Borges (47) hakotu iis iha domingu (11/04), tanba aleinde moras stroke, rezultadu teste swab ne’ebé ekipa saúde sira halo hatudu rezultadu pozitivu COVID-19, tanba ne’e ekipa forsa-tarefa hosi Sala Situasaun-CIGC no MS, asegura atu haloot mate-isin tuir protokolu saúde iha Metinaro.

Enkuantu, Xanana ne’ebé reprezenta família matebian, defende katak nia maluk hakotu iis tanba moras komplikasaun, ne’ebé la’ós tanba COVID-19, tanba ne’e husu atu hasai mate-isin hosi sentru izolamentu hodi entrega ba família no haloot tuir tradisaun Timór.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here