Xanana Gusmão hakalma joven sira ne’ebé hamrik iha areadór sentru izolamentu Vera Cruz no husu labele hakilar, tersa (13/04). Imajen TATOLI/António Gonçalves

DILI, 13 abríl 2021 (TATOLI)—Líder istóriku, Kay Rala Xanana Gusmão, kontinua toba iha sentru izolamentu pasiente COVID-19 iha Vera Cruz, ba kalan daruak hodi hein desizaun haloot mate-isin.

Eis Primeiru-Ministru ne’e kontinua nahe biti no sumasu hodi toba iha estrada, iha dalan klaran areadór sentru izolamentu.

“Imi dook tanba ha’u atu toba,” Líder karizmátiku ne’e hateten ba ema sira ne’ebé iha Vera Cruz, tersa kalan ne’e.

Xanana Gusmão hahú deskansa maizumenus tuku sia liu, hafoin halo negosiasaun ho autoridade kompetente hosi parte Governu maibé to’o agora seidauk iha solusaun.

Notísia relevante: Xanana hahú toba ona iha sentru izolamentu oin

Tuir observasaun Jornalista Agência TATOLI iha terrenu, nota katak Xanana Gusmão toba akompaña ho família matebian Armindo Borges (47) no hetan seguransa másimu hosi pesoál seguransa sira.

Armindo Borges (47) hakotu iis iha domingu (11/04), tanba aleinde moras stroke, rezultadu teste swab ne’ebé ekipa saúde sira halo hatudu rezultadu pozitivu COVID-19, tanba ne’e ekipa forsa-tarefa hosi Sala Situasaun-Sentru Integradu Jestaun Krize (CIGC, sigla portugés) no Ministériu Saúde, asegura atu haloot mate-isin tuir protokolu saúde iha Metinaro.

Enkuantu, Xanana ne’ebé reprezenta família matebian, defende katak nia maluk hakotu iis tanba moras komplikasaun, ne’ebé la’ós tanba COVID-19, tanba ne’e husu atu hasai mate-isin hosi sentru izolamentu hodi entrega ba família no haloot tuir tradisaun Timór.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here