Ekipa saúde hatudu vasina AstraZeneca, iha Sentru Saúde Bairru Formosa, kuarta (07/04). Imajen TATOLI/António Gonçalves

DILI, 14 abríl 2021 (TATOLI)–Ministra Saúde, Odete Maria Freitas Belo, halo ona aprezentasaun ba Konsellu Ministru (KM) kona-ba progresu kampaña nasionál vasinasaun kontra COVID-19.

“Iha loron 07 abríl, vasina 24.000 maka to’o ona iha Timor-Leste no halo ona vasina hamutuk 2.629, ne’ebé hosi númeru hirak feto 887 no mane 1.742 maka simu vasinasaun,” Ministru Prezidénsia Konsellu Ministru, Fidelis Manuel Leite Magalhães relata hafoin ramata reuniaun ezekutivu iha Palásiu Governu, kuarta ne’e.

Notísia relevante: Vasina AstraZeneca hanesan asaun ikus ba prevensaun COVID-19

 Nune’e, vasina ona mós profisionál saúde hamutuk 1.619 no profisionál liña frente hamutuk 1.010.

Ministra Saúde halo mós aprezenta rezultadu teste variante SARS-CoV-2 ne’ebé Timor-Leste iha no analiza ona iha Austrália.

“Rezultadu barak maka hetan iha amostra 70 ne’ebé analiza ona no hatudu padraun hanesan ba ida-ne’ebé deteta ona iha país sira seluk iha rejiaun no deteta ona kazu variante ida hosi Reinu Unidu (B.1.1.7), kona-ba pasiente ne’ebé iha hela izolamentu profilátiku bainhira deteta ona iha loron 27 dezembru 2020 no la provoka kontájiu,” haktuir Portavós Governu.

Aleinde ne’e, la deteta kazu variante sira iha Áfrika Súl (B.1.351) no hosi Brazíl (P.1), ne’ebé  sei haruka tuir aviaun tuirmai amostra hamutuk 246 hodi bele halo analiza.

Iha faze dahuluk vasina sei kobre populasaun 8%, ne’ebé 3% korresponde ba traballadór liña frente, liuliu funsionáriu sira ne’ebé serbisu iha unidade kuarentena no izolamentu, ka iha postu entrada hanesan aeroportu, portu no terrestre, no 5% sei abranje ba populasaun ne’ebé hela iha área besik fronteira terrestre no ema sira ne’ebé konsidera risku ba kontaminasaun.

Iha faze daruak, sei abranje populasaun 12%, inklui sidadaun sira ne’ebé ho idade 60, liuliu sira ne’ebé hela iha Rejiaun Administrativa Espesiál Oé-cusse Ambeno (RAEOA), iha Dili, Covalima no Bobonaro.

Aleinde ne’e, iha faze daruak sei abranje mós, profisionál saúde, profesór, pesoál restaurasaun, loja no merkadu sira, pesoál konfisaun relijioza sira, no líder komunitáriu no polítiku sira ne’ebé hela iha RAEOA, Dili, Covalima, no Bobonaro.

Grupu sira ne’ebé integra iha faze datoluk hamutuk 80% populasaun ne’ebé hela iha Timor-Leste, ne’ebé sei define konstante ba evolusaun klíniku nasionál sira no ritmu fornesimentu vasina.

Vasina ne’e sei efetua iha estabelesimentu Servisu Nasionál Saúde, ne’ebé sei aloka ekipa treinada vasinasaun sira, hodi haree espesifikasaun vasina kontra COVID-19.

 Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here