Primeiru-Ministru, Taur Matan Ruak, hamutuk ho entidade relevante observa direta estrada protokolu Praia dos Coqueiros ne’ebé hetan estragus hosi dezastre naturál, tersa (06/04/21). Imajen Tatoli/Egas Cristóvão.

DILI, 10 abríl 2021 (TATOLI)—Primeiru-Ministru (PM), Taur Matan Ruak, ohin, konvoka reuniaun ho Vise Primeiru-Ministru no Ministru Planu Ordenamentu, José Maria dos Reis no Ministru Obra Públika, Salvador Eugênio dos Reis Soares Pires, iha salaun Ministériu Finansas, Ai-tarak Laran, hodi buka hatene progresu prosesu levantamentu, partikularmente ba estrada dirasaun Praia dos Coqueiros ne’ebé hetan estragu iha Embaixada Japaun nia oin.

Notísia Relevante: PM orienta MPO-MOP sobu ponte Bekusi no harii foun

Tuir nota imprensa ne’ebé Agência Tatoli asesu ne’e haktuir, reuniaun ne’e hala’o bazea ba Primeiru-Ministru nia observasaun ba fatin afetadu hosi dezastré naturál ne’ebé akontese iha loron domingu (04/04) liubá ne’e, no Xefe Governu orienta tékniku MOP no ADN sira atu prosesa lalais levantamentu.

“Se di’ak liután loron ida ka rua oin mai, indika ona Kompañia hodi mobiliza ekipamentu pezada hodi bele halo ona reabilitasaun emerjénsia ba estrada refere, tanba estrada ne’e tama iha kategoria dalan protokolu ne’ebé presiza normaliza lalais,” Primeiru-Ministru, Taur Matan Ruak, relata.

Kona-ba preokupasaun Xefe Ezekutivu ne’e, tékniku sira afirma, dezeñu prontu ona no daudaun ne’e iha hela verifikasaun ADN nian, no hein katak iha loron ida ka rua tan bele ona implementa.

“Tékniku MOP mós esplika se kompañia indikadu iha kapasidade no volume serbisu di’ak iha kaer obra, garante to’o semana ida estrada refere bele ona normaliza fali ho fui alkatraun,” nota ne’e haktuir.

Eis Xefe Estadu ne’e husu atu indika kompañia ne’ebé iha kapasidade finanseira no materiál nune’e bele kaer obra ho di’ak.

Jornalista: Antónia Gusmão

Editór: Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here