DILI, 12 abríl 2021 (TATOLI)—Líder istóriku, Kay Rala Xanana Gusmão, deside toba iha sentru izolamentu Vera Cruz, tanba seidauk iha desizaun hosi parte rua entre família matebian Armindo Borges (47) no Sala Situasaun-Sentru Integradu Jestun Krize (CIGC, sigla portugés) no ekipa saúde.
Xanana Gusmão ne’ebé reprezenta família husu atu entrega mate-isin ba família atu haloot tuir tradisaun Timór tanba konsidera nia maluk mate la’ós tanba COVID-19 maibé tanba moras stroke.
Enkuantu, hosi parte CIGC no ekipa saúde defende matebian mate tanba COVID-19, tanba molok matebian hakotu iis, bazeia ba teste swab hatudu rezultadu pozitivu, tanba ne’e ekipa forsa-tarefa hakarak haloot matebian tuir protokolu saúde ba pasiente COVID-19 iha Metinaro.
“Mai nahe biti iha estrada no besik kaixaun atu ha’u toba ona,” Xanana Gusmão hateten iha sentru izolamentu Vera Cruz, Caicoli, segunda kalan ne’e.
Notísia relevante: Xanana orienta PNTL haruka joven sira fila ba uma
Líder karizmátiku ne’e ho Família matebian hahú hato’o ejizénsia ba Governu atu entrega mate-isin, iha tuku 8:00 dader to’o kalan ne’e.
Halo ona negosiasaun ho Ministra Saúde i klui entidade sira hosi CIGC maibé seidauk hetan solusaun.
Xanana Gusmão ho matebian nia kaben inklui oan sira, deside toba hotu iha izolamentu kalan ne’e.
Antes atu deskansa, eis Prezidente Repúblika ne’e fó instrusaun ba Polísia Nasionál Timor-Leste (PNTL) atu haruka joven sira fila ba uma ho hakmatek no hametin pás no estabilidade.
Nune’e, Xanana hamutuk ho sarani balun reza iha Igreja Protestante, Evanjélika Presbiteriana Ebezer, Vera Cruz, Dili, ne’ebé dirije hosi Padre Ângelo Salsinha.
Tuir observasaun Agência TATOLI iha terrenu, nota katak daudaun ne’e situasaun hakmatek ho akompañamentu hosi Polísia ne’ebé kontinua asegura resintu fatin izolamentu.
Entretantu, Xanana Gusmão toba nahe biti iha estrada leten besik karreta tula kaixaun ne’ebé prepara hosi família matebian.
Jornalista: Florêncio Miranda Ximenes
Editora: Julia Chatarina