Edifísiu eskola EBF Casnafar, Manleuana-Dili, ne’ebé hetan estragus hosi inundasaun iha 04 abríl. Imajen/Facebook.

DILI, 13 abríl 2021 (TATOLI)—Posibilidade Ministériu Edukasaun Joventude no Desportu (MEJD), sei halo konstrusaun foun ba edifísiu eskola Ensino Basico Filial (EBF) Casnafar, iha fatin seluk, tanba edifísiu atuál ne’ebé hetan estragus totál hosi inundasaun, konstrui iha mota laran.

“MEJD hanoin ona no posibilidade sei buka fatin ruma ne’ebé seguru atu harii fali edifísiu foun ba estudante-sira, área edifísiu atuál ne’e risku, tanba iha mota laran,” Diretór Nasionál Asaun Sosiál Eskolár (DNASE), Joaquim Martins, hateten ba jornalista-sira iha MEJD Vila Verde, tersa ne’e.

Notísia relevante:Dadus finál MEJD, inundasaun afeita eskola 25 no ualu grave

Diretór ne’e dehan, bainhira MEJD obriga tau osan hodi kontinua hadi’a nafatin edifísiu eskola ne’e iha mota laran, automatikamente sei hasoru nafatin risku, bainhira mota boot iha tempu udan.

Tuir observasaun no levantamentu hosi MEJD katak, kondisaun edifísiu eskola Casnafar, Manleuana, Dili grave tanba hetan estragus totál, edifísiu laran nakonu ho rai henek.

Parte MEJD mós konsulta ona ho Dirasaun infraestrutura atu haree ba situasaun ida ne’e, nune’e buka alternativa di’ak liu, molok desizaun finál hodi halo konstrusaun foun.

Dadus finál hosi Ministériu Edukasaun Joventude no Desportu (MEJD) hatudu katak, edifísiu eskola hamutuk 25 mak afetadu hosi inundasaun iha loron 3-4 abríl, no hosi númeru ne’e iha edifísiu eskola ualu mak tama kategoria grave totál.

Jornalista: Tomé Amado

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here