Kondisaun EBF Casnafar ne’ebé afeitadu hosi inundasaun. Imajen/facebook.

DILI, 07 abríl 2021 (TATOLI)—Dadus finál hosi Ministériu Edukasaun Joventude no Desportu (MEJD) hatudu katak, edifísiu eskola hamutuk 25 mak afetadu hosi inundasaun iha loron 3-4 abríl, no hosi númeru ne’e iha edifísiu eskola ualu mak tama kategoria grave totál.

Edifísiu eskola ualu ne’ebé tama kategoria grave totál mak hanesan eskola Ensino Secundario Geral (ESG) 5 de maio, ESG Sérgio Viera de Melo, ESG 4 setembru UNAMET, eskola Ensino Basico (EBC) Manleuana, eskola Ensino Basico Filial (EBF) Fatuhada, EBF Casnafar, eskola Ensino Secundario Tecnico Vocacional (ESTV) Hera, no EBC Osahuna Baguia.

Notísia relevante:Inundasaun estraga eskola 14 iha Dili, Baucau ida no Liquiça ida

“Eskola sira ne’e ita identifika tama iha kategória grave totál, tanba kondisaun aredores to’o sala-de-aula nakonu ho tahu, moru eskola monu inklui kakuluk eskola naksobu,” Diretór Nasionál Asaun Sosiál Eskolár (DNASE), Joaquim Martins, hateten ba jornalista-sira iha MEJD Vila Verde, kuarta ne’e.

Iha mós eskola ualu seluk ne’ebé  kategoria grave natón mak hanesan eskola ESTV Becora, EBC siklu 3 Fatumeta, ESG no EB 10 dezembru Comoro, EBF Bebonuk, ESTV 28 novembru, EBF Beduku, ESG Dare, no EB São José Haslaran.

“Eskola sira-ne’e parte moru eskola mak rahun, maibé kondisaun eskola kategoria normál hela,” nia subliña.

Alende ne’e, edifísiu eskola sia ne’ebé afeitadu inundasaun ho kategoria kamaan mak hanesan, EBF Aimutin, EBF Faról, EBF Nú Laran, EBC Akadiruhun, EBF Bidau Masaur, EBF Doque de Caxias Bemori, EBF Metiaut, ESG Metinaro no EBF Renbor Manatuto.

Atu responde ba situasaun ne’e, parte MEJD husu ona apoiu hosi Bombeiros-nian atu halo intervensaun liuliu rega tahu ne’ebé sei belit iha aredór eskola-nian.

Entretantu, Diresaun Nasionál Asaun Sosiál Eskolár (DNASE) halo levantamentu dadus ba eskola afetadu-sira bazeia ba despaixu hosi Vise-Ministru Edukasaun Joventude no Desportu (MEJD) iha loron 4 abríl 2021 ho karaktér emerjénsia.

Rezultadu levantamentu ne’e parte DNASE relata ona ba Vise MEJD no hein intervensaun hosi Serbisu Protesaun Sivíl.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here