Xefe Estadu Maiór Jenerál F-FDTL, Tenente Jenerál, Lere Anan Timur, konversa ho líder nasionál Kay Rala Xanana Gusmão, iha sentru izolamentu Vera Cruz, (13/04/21). Imajen Tatoli/António Gonçalves.

DILI, 13 abríl 2021 (TATOLI)—Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Lere Anan Timur, halo negosiasaun ho líder karismátiku Kay Rala Xanana Gusmão kona-ba mate-isin Armindo Borges ne’ebé oras ne’e iha hela sala Izolamentu Vera Cruz maibé seidauk iha rezultadu.

Notísia Relevante: Xanana-Família matebian kontinua rejeita  entrega mate isin ba Governu  

Fofoun Lere sama-ain iha sala Izolamentu Vera Cruz, Xanana Gusmão husu hasoru Lere Anan Timur ho lia hahusuk “Iha asuntu ruma atu ko’alia” no Lere Anan Timur hatán “Los! Ha’u ha’u atu ko’alia ho maun.”

Iha negosiasaun ne’e, Xanana Gusmão informa ba Lere Anan Timor katak matebian Armindo Borges nia oan tanis mak halo nia tenke halo asaun hodi kurize atuasaun Governu nian kona-ba prevensaun COVID-19 iha Timor-Leste.

Maibé, iha biban ne’e, Lere Anan Timur husu ba Xanana atu entrega problema ne’e ba nia no Governu atu rezolve hodi lori mate-isin ba hakoi.

Tenente Major Jeneral Lere Anan Timur bainhira hasoru malu ho Xanana Gusmao iha Fatin Isolamentu Vera Cruz, 13 Abril 2021.Imajen Tatoli/Antonio Goncalves

“Se maun konfia nafatin ha’u, entrega problema ba ha’u mak rezolve. Maun ba haree nasaun nia problema, mate-isin ita ba hakohi. Maun entrega problema ne’e ba ami atu ami rezolve, nia mate ona, ita hakoi tiha,” Lere hateten ba Xanana.

Maske nune’e, Xanana Gusmão fó resposta ba Lere Anan Timur katak nia parte sei mantein iha fatin izolamentu ne’e to’o Governu deside entrega mate-isin ne’e ba família.

“Ha’u la ba deskansa. Só ba deskansa enkuantu sira mai entrega mate-isin, hodi ha’u ba hakoi tiha mak ha’u ba. Ne’e la’ós impede Governu nia hahalok, atu kurize Governu nia hahalok iha COVID-19. Mate-isin dodok iha-ne’e mós ha’u hein lori ba hakoi,” Xanana afirma.

Ho resposta ida-ne’e, Lere Anan Timur kontinua fó hanoin ba Xanana Gusmão katak problema defisil maibé entrega mate-isin ba Governu atu rezolve.

“Maun entrega ami rezolve, ita hamutuk ita harii nasaun ida-ne’e. Ha’u konsidera ha’u-nia maun nafatin no ha’u-nia mestre,” Lere Anan Timur hatán Xanana ho matan-been monu.

Maibé, Xanana Gusmão kontinua resposta ba Lere Anan Timur. “Militár tama fali iha sivíl mós ladún furak ida,” Xanana hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here