Membru PNTL hala’o hela seguransa bainhira juventude sira halo asaun pasífiku iha Sentru Izolamentu Vera Krús, Dili, segunda (12/04). Imajen Tatoli/Antonio Goncalves

DILI, 13 abríl 2021 (TATOLI)- Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Lere Anan Timur, husu ba autoridade seguransa Polísia Nasionál Timor-Leste (PNTL) atu haruka fila juventude sira ne’ebé halibur malu organiza asaun pasífiku iha arredores Sentru Izolamentu Vera Krús, Dili.

Notísia Relevante : Juventude sira hawelok Xanana no hakilar “TL laiha COVID-19”

Iha ámbitu hasoru malu ho Komandante Em-Xefe FALINTIL, Kay Rala Xanana Gusmão, tersa dadeer ne’e, iha Sentru Izolamentu Vera Krús, Tenente Jenerál ho naran kompletu Tito da Costa Cristóvão “Lere Anan Timur” ne’e husu ba polísia atu mantein nafatin seguransa ho profisionál  no haruka fila ona juventude sira ne’ebé halibur-malu lori espanduk halo asaun pasífiku iha área Sentru Izolamentu Vera Krús.

Tenente Jenerál Lere Anan Timur bainhira hasoru-malu ho Xanana Gusmão iha Sentru Izolamentu Vera Krús, Dili, 13 abríl 2021.Imajen Tatoli/Antonio Gonçalves

Lere dehan, Timor-Leste implementa hela Estadu Emerjénsia, tanba ne’e la iha nesesidade ba kualkér grupu organizasaun no juventude sira atu halo manifestasaun kontra Estadu ida-ne’e.

“Joven sira orasida imi hatene ba malu, ha’u lakohi imi konsentra iha ne’e, husik katuas Xanana ho família matebian maka iha ne’e ho polísia. Se, joven sira, imi mak konsentra ha’u haruka polísia dudu imi fila,” Lere afirma tan.

Lere dehan, problema ne’ebé akontese kona-ba mate-isin matebian Armindo Borges (47) hosi Munisipiu Ainaro ne’ebé mate ona, entrega ba Governu Timor-Leste maka deside no labele halo manifestasaun hodi kontra fali Governu.

“Joven sira la iha nesesidade atu imi mai konsentra iha ne’e. Imi labele halo polísia mós ulun moras. Polísia iha feen no oan no polisia mós iha problema no sira mós ema atu halo seguransa,” Lere tenik.

Tuir Lere, problema ne’ebé akontese iha Timor-Leste la’ós tanba kestaun hadau-malu mate-isin, maibé problema partikulár entre Lider Nasionál sira hanesan, Francisco Guterres Lú Olo, Taur Matan Ruak no Xanana mak iha diferensa ida.

“Husik katuas sira maka ko’alia problema ne’e ba malu, Taur mak Primeiru Ministru, Lú Olo maka Prezidente Repúblika, no Xanana maka sira-nia maun, no ami sira ne’e ko’alia sira la rona ona,”  Lere hateten ho matan-been.

Lere konsidera problema ne’ebé Xanana defende hamutuk ho família matebian, la’ós problema partidu polítiku sira nian, tanba ne’e alerta ba kuakér partidu polítika atu la bele aproveita situasaun ne’e hodi halo manifestasaun.

Iha parte seluk, Lere kumprimenta mós família matebian hodi fó korajen atu hamutuk ho Xanana Gusmão, hodi hein desizaun Governu nian bele fó solusaun ida di’ak ba família no di’ak ba nasaun.

Iha fatin hanesan, Lider Karizmátiku, Kay Rala Xanana Gusmão mós alerta ba joven sira atu labele konsentra halo manifestasaun hodi kria fali konflitu.

“Ha’u husu ba polísia haruka joven sira ne’e fila. Tanba ne’e la’ós imi nia problema, ha’u lakohi atu mai halo fali buat oin-oin iha ne’e, polísia ajuda haree sira haruka fila,”  Xanana hateten.

Xanana mós apela ba populasaun iha Timor-Leste kontinua tuur hakmatek hodi kontribui ba estabilidade seguransa iha Timor-Leste.

Tuir observasaun Agência Tatoli nian iha terrenu Sentru Izolamentu Vera Krús nota katak oras ne’e, Komandu PNTL koloka ona membru Batallaun Orden Públiku (BOP), Unidade Polísia Marítima (UPM), Taskforce Dili, Servisu Informasaun Polísia (SIP) no parte Intelijénsia F-FDTL halo seguransa másimu hodi evita problema ka konflitu.

Jornalista        : Eugénio Pereira

Editór              : Francisco Simões 

HAKEREK NO HATÁN

Please enter your comment!
Please enter your name here