Membru Polísia Nasionál Timor Leste (PNTL) asegura família no joven-sira ne’ebé ezije Governu atu entrega mate isin Armindo Borges iha Sentru Izolamentu Vera Cruz, Dili, segunda (12/04). Imajen Tatoli/António Gonçalves.

DILI, 13 abríl 2021 (TATOLI)—Sala Situação Centro Integrado Gestão de Crise (SS-CIGC), ohin rejista kazu foun hamutuk 12, númeru ne’e inklui kazu moderadu ida no totál pasiente ativu 544.

“Kazu detetatu foun 12, mai hosi iha Dili hamutuk hitu, no Munisípiu-sira seluk lima. Totál kazu ativu 544. Hosi totál kazu foun ohin iha mane na’in-haat, feto na’in-ualu ne’ebé 100% asintomátiku,” Koordenadór Forsa-Tarefa ba Prevensaun no Mitigasaun, Rui Maria de Araújo hato’o liu hosi komunikadu, tersa ne’e.

Notísia relevante:COVID-19: kazu foun 28, ativu 544

Rui Maria de Araújo, esplika ohin iha tan kazu detetadu ho kategoria moderadu baixa iha izolamentu Vera Cruz. Kazu ida ne’e detetadu pozitivu iha HNVG, mai ho isin-rua no keixa katak loron tolu ona bebé la bo’ok-an.

“Diagnóstiku traballu, COVID-19 plus IUFD (Intra Uterine Fetal Death). Kazu grave ne’ebé iha Vera Cruz, desde horisehik uza ventiladór no ai-moruk balun tuir protokolu ne’ebé Timor-Leste adopta. Ohin saturasaun oksijéniu 96%, no estável,” nia subliña.

Evolusaun iha Munisípiu Dili, iha 13 abríl deteta kazu foun hitu. Nune’e, kazu detetadu ka pozitivu iha Munisípiu ne’e hosi 7 marsu, loron ne’ebé hahú deteta kazu iha cluster BTN II, Terra Santa, suku Madohi, to’o ohin, hamutuk hotu 844.

Ho baze ba informasaun ne’ebé disponível, ekipa konjunta saúde halo fali revizaun ba foku propagasaun ka cluster iha Munisípiu Dili, suku sai nu’udár área jeográfika ne’ebé uza hanesan baze atu haree ligasaun entre kazu, no ligasaun ho espozisaun ba fonte infesaun. Munisípiu Dili, hamutuk hotu, sei nafatin iha cluster 23.

Ohin, iha Munisípiu Liquiça deteta-tan kazu foun haat. Kazu hirak ne’e halo viajen hosi Dili no Munsípiu Aileu deteta ona kazu pozitivu ida, ne’ebé halo viajen mós hosi Dili.

Kona-bá evolusaun iha Munisípiu sira-seluk no Rejiaun Administrativa Espesiál Oe-cusse Ambeno (RAEAO) ohin, la deteta kazu foun.

Hosi horisehik mai ohin, Laboratóriu Nasionál Saúde (LABNAS) halo ona teste PCR hamutuk 452 ho detalla hanesan tuir mai, Vijilánsia sentinela 85, Rastreiu ba kontaktu ka Contact tracing  rua, Rastreiu Aleatoriu  ka Random Screening 10, Viajen sai hosi serka sanitária Munisípiu Dili 207, Viajen internasionál 148.

Totál pedidu autorizasaun esesionál atu sai hosi serka sanitária iha Munisípiu Dili, iha 13 abríl, hamutuk hotu 215. Sekretariadu CIGC responde hotu kedan, maibé pedidu 10 la prienxe kritériu tuir Rezolusaun Governu.

Notísia relevante:MS propoin millaun $34 ba OR hodi prevene COVID-19

Jornalista: Felicidade Ximenes

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here