Ekipa treinadu hosi MS, hiit hela mate-isin ne’ebé mate tanba COVID-19, hodi ba haloot iha Metinaro, tersa (06/04). Imajen TATOLI/Joanico de Araújo.

DILI, 13 abríl 2021 (TATOLI)—Ministériu Saúde (MS) propoin millaun $34 ba Orsamentu Retifikativu (OR), hodi prevene COVID-19 no fasilita vasinasaun iha Timor-Leste (TL).

Proposta ne’e Ministra Saúde, Odete Maria Freitas Belo aprezenta ona ba Parlamentu Nasionál (PN), liu hosi adiénsia públika ho komisaun F ne’ebé trata Asuntu Saúde, iha PN tersa ne’e.

Notísia relevante:COVID-19: kazu foun 28, ativu 544

“Ita planeia ona atu hatán ba nesesidade, entaun orsamentu ne’e hamutuk millaun $34 ba asuntu COVID-19 no vaisnasaun,’’ Odete Maria Freitas Belo, hateten ba jornalista-sira hafoin audiénsia.

Tuir planu, orsamentu ne’e MS sei utiliza ba fatin izolamentu balun, ne’ebé la konsegue finaliza,  tanba  orsamentu la prevee iha Orsamentu Jerál Estadu (OJE) 2021.

“Orsamentu ne’e mós sei utiliza ba hahán iha izolamentu no kuarentena, inklui atu selu akomodasaun-sira ne’ebé durante iha,” nia subliña.

Entretantu, audiénsia públika entre MS ho Komisaun F ho objetivu atu aprezenta orsamentu ne’e, hodi diskute hamutuk, ba proposta primeira alterasaun Lei Orsamentu Jerál Estadu (OJE) 2021, númeru 14/2020, 29 dezembru.

Jornalitsa: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here