Inundasaun iha Tasitolu, domingu (04/04). Imajen TATOLI/António Gonçalves

DILI, 08 abríl 2021 (TATOLI)—Sekretáriu Estadu Protesaun Sivil, Joaquim José Gusmão dos Reis Martins, halo aprezentasaun iha reuniaun Konsellu Ministru kona-ba pontu situasaun impaktu hosi inundasaun ne’ebé provoka husi siklone tropikál Seroja.

Sekretaria Estadu Protesaun Sivíl (SEPS) hahú halo levantamentu dadus no rejista ona ema hamutuk 10.000 mak lakon uma iha Dili durante akontesimentu dezastre naturál iha domingu (04/04).

“Daudaun ne’e alojadu sira iha sentru akollimentu ne’ebé espalla iha sidade Dili. Bee-sa’e provoka ema 42 mate, 22 hosi Dili, sanulu iha Ainaro, lima iha Manatuto, na’in-tolu iha Viqueque no na’in-rua iha Aileu,” Ministru Prezidénsia Konsellu Ministri, Fidelis Manuel Leite Magalhães relata hafoin ramata reuniaun ezekutivu iha Palásiu Governu, kinta ne’e.

Dezastre naturál estraga komunidade nia hela fatin inklui estraga mós infraestrutura públika hanesan ponte, estrada no fasilidade sira seluk.

Ho ida-ne’e, Governu halo kálkulu ona kustu estragu dezastre naturál iha territóriu tomak ho valór orsamentu hamutuk millaun $100.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here