Serimónia entrega no distribuisaun ai-moruk Vasina AstraZeneca entre UNICEF ho Ministériu Saúde iha edifísiu SAMES, Dili (08/04/21). Imajen Tatoli/António Gonçalves.

DILI, 11 abríl 2021 (TATOLI)—Sala Situação Centro Integrado Gestão de Crise (SS-CIGC),  rejista tan kazu pozitivu COVID-19 hamutuk 38, hosi totál ne’e maioria detetadu iha Munisípiu Dili, kazu 11 iha munisípiu-sira seluk, no kazu moderadu na’in-ida.

Koordenadór Forsa-Tarefa ba Prevensaun no Mitigasaun, Rui Maria de Araújo, relata evolusaun surtu COVID-19 iha TL bazeia ba rezultadu teste swab no análiza hosi Laboratóriu Nasionál Saúde (LABNAS).

Notísia relevante:COVID-19: Kazu foun 61 no kazu ativu 532

Hosi evolusaun ne’e, iha munisípiu Dili rejista kazu foun 27, nune’e kazu detetadu ka pozitivu iha munisípiu ne’e hosi loron 7 marsu  hahú loron ne’ebé deteta kazu iha cluster BTN II, Terra Santa, Madohi, to’o 11 abríl 2021, hamutuk hotu 823.

“Husi totál kazu detetadu foun sira-ne’e, 100% asintomátiku. Iha domingu ne’e, rejista tan kazu detetadu ho kategoria moderadu, baixa iha izolamentu Vera Cruz. Kazu ida-ne’e inan isin-rua fulan-sia, hein atu tama prosesu partu. Hamutuk hotu iha kazu moderadu na’in-tolu iha Vera  Cruz. Enkuantu, sira hotu-nia kondisaun estável,” Rui Maria de Araújo informa liuhosi konferénsia imprensa iha Centro Convenções Dili (CCD), domingu ne’e.

Koordenadór ne’e akresenta, ho baze ba informasaun ne’ebé disponível, ekipa konjunta saúde halo fali revizaun ba foku propagasaun ou klaster iha Dili. Suku sai nu’udár área jeográfika ne’ebé uza hanesan baze atu haree ligasaun entre kazu, no ligasaun ho espozisaun ba fonte infesaun.

Ho evolusaun surtu COVID-19 iha Munisípiu Baucau iha domingu ne’e deteta kazu foun ida, kazu ne’e halo viajen hosi Dili, nune’e kazu detetatu iha Baucau hamutuk hotu 36 kazu detetadu.

“Ho baze ba informasaun ne’ebé disponível, ekipa konjunta saúde halo fali revizaun ba foku propagasaun ou klaster iha Baucau no uza Postu Administrativu nu’udár área jeográfika foku hamutuk neen iha Baucau,” Rui Maria de Araújo haktuir.

Alende ne’e, evolusaun iha Munisípiu Bobonaro iha domingu ne’e deteta kazu foun ida, kazu ne’e  halo viajen hosi Dili no mós iha Ainaro deteta-tan kazu pozitivu rua, kazu rua ne’e mós hanesan viajen hodi Dili.

Kona-bá evolusaun surtu COVID-19 iha Ermera, rejista kazu hamutuk hitu, kazu hirak ne’e, halo viajen hosi Dili.

Iha munisípiu-sira seluk inklui Rejiaun Administrativa Espesiál Oe-cusse Ambeno (RAEOA) la deteta kazu foun.

“Kazu rekoperadu iha 11 abríl hamutuk 33, tanba ne’e totál kazu ativu hamutuk 536, daudaun ne’e iha sala Izolamentu. Hosi totál kazu detetadu foun ohin, kompostu hosi mane na’in-15 no feto 23,” Rui subliña.

Hahú hosi horiseik  to’o ohin,  LABNAS halo teste PCR hamutuk 1.120, kompostu hosi Vijilánsia sentinela 50, rastreiu ba kontaktu 53, rastreiu aleatóriu ou random screening 216.

Viajen sai-hosi serka sanitária Munisipiu Dili hamutuk 531, viajen internasionál hamutuk 225, Follow up iha kuarentena 45.

Totál pedidu autorizasaun esesionál atu sai hosi serka sanitaria iha Dili, iha 10 abríl hamutuk 313. Hosi númeru ne’e Sekretariadu CIGC responde hotu kedan, maibé pedidu 18 la prienxe kritériu tuir Rezolusaun Governu.

Parte CIGC apela ba populasaun tomak, liu-liu iha Dili no Munisipiu-sira ne’ebé afetadu ho inundasaun iha semana liu bá katak, maski lakon uma, sasan no hela fatin, no tenki evakua ba fatin públiku-sira, halo favor nafatin uza meius-hotu ne’ebé iha, atu hado’ok-an hosi kontájiu COVID-19, liu-liu nafatin uza máskara, no faze liman beibeik.

Husu mós ba populasaun ne’ebé provizóriamente tenki hela iha sentru evakuasaun-sira, atu kolabora ho ekipa konjunta saúde, hodi foti amostra ba análiza laboratóriu.

Jornalista: Antónia Gusmão

Editór: Cipriano Colo

HAKEREK NO HATÁN

Please enter your comment!
Please enter your name here