MInistru Edukasaun Joventude no Desportu, Armindo Maia. Imajen/Egas Cristovão.

DILI, 09 abríl 2021 (TATOLI)—Ekipa Ministériu Edukasaun Joventude no Despotu (MEJD), hala’o audiénsia ho Komisaun G Parlamentu Nasionál, ne’ebé aprezenta proposta orsamentu millaun $5-resin, atu bele asesu ba Orsamentu Retifikativu (OR), iha ámbitu COVID-19 no situasaun kalamidade.

Ministru Armindo Maia konsidera audiénsia públika ne’e pertinente tebes, tanba bele diskute mekanizmu no medida proposta Lei primeira alterasaun lei númeru 14/2020, 29 dezembru Orsamentu Jerál Estadu (OJE) 2021.

Notísia relevante:PN hahú halo audiénsia públika kona-ba alterasaun Lei OJE 2021

Maski MEJD mai ho proposta, maibé Governante ne’e hateten, Lei ne’e presija duni atu hetan alterasaun, nune’e bele fó dalan ba Ministériu atu utiliza OR.

“Ita mai ho proposta millaun $5-resin atu prevee ba nesesidade Ministériu-nian, tanba haree ba situasaun ne’ebé akontese iha ita-nia rain, situasaun ne’ebé laiha dalan ba Governu atu uza OJE 2021,” Armindo Maia hateten ba jornalista Agência Tatoli hafoin audiénsia iha rezidénsia ofisiál Prezidente Parlamentu Nasionál, Faról, sesta ne’e.

Nune’e mós Prezidente Komisaun G trata Asuntu Edukasaun Joventude, Kultura no Sidadania, António Verdiál de Sousa Gama, hateten sei fó votu a favór ba proposta ne’e, tanba orsamentu ne’ebé propoin, MEJD-rasik mak sei implementa.

“Sira kala sukat ona kbi’it ho rekursu ne’ebé iha mak ohin aprezenta proposta ne’e. Tanba ne’e, hanesan deputadu ha’u sei fó votu a favór ba proposta OR hosi MEJD,” António Verdiál deklara.

Audiénsia públika ne’e Ministru Armindo Maia akompaña hosi Vise-Ministru Edukasaun, António Guterres, Sekretáriu Estadu Joventude no Desportu (SEJD), Abrão Saldanha, Diretór Jerál-sira no Diretór nasionál-sira.

Jornalista: Tomé Amado

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here