Inundasaun iha Tasi-tolu, Dili, domingu (04/04/21). Imajen Tatoli/António Gonçalves.

DILI, 12 abríl 2021 (TATOLI)-Sekretária Estadu Protesaun Sivíl (SEPS) ho koordenasaun liña ministeriál kontinua rekolla dadus família afetadu dezastre naturál hodi apura loloos molok distribui apoiu rekuperasaun.

Notísia Relevante : Governu sei realiza sorumutuk ho parseiru internasionál

“Ita presiza dadus ida ne’ebé mak estragu maka’as, natoon ho kaman tuir padraun SEPS nian hodi fó apoiu rekuperasaun hanesan materiál konstrusaun ho osan mão de obra,” Sekretáriu Estadu SEPS, Joaquim José Gusmão hateten ba Agência Tatoli iha edifísiu Ministériu Finansa, Dili, segunda ne’e.

Nia esplika, normálmente SEPS halo levantamentu dadus ba iha apoiu emerjénsia bainhira identifika ona estragu maibé iha mós orientasaun ho liña koordenasaun hamutuk ho Ministériu Administrasaun Estatál (MAE) ne’ebé daudaun konkorda ona formatu bolu multi sektorál ba levantamentu kona-ba estragu iha territóriu Timor-Leste.

Kona-ba orsamentu, Joaquim Gusmão dehan, ida-ne’e sei halo estimasaun hein dadus no bele finansia hosi fundu kontinjénsia.

Tuir dadus ofisiál provizóriu liuhosi koordenasaun ministerial ne’ebé lidera hosi Ministériu Administrasaun Estatál (MAE) hatudu katak ema lakon vida aumenta ba na’in-46 no família afetadu iha territóriu nasionál hamutuk uma-kain 4.590 ho totál ema 12.378 mak hela iha sentru evakuasaun 43.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here