Bee-moos. Imajen/Espesiál

DILI, 18 fevereiru 2021 (TATOLI)Primeiru-Ministru (PM), Taur Matan Ruak, konvoka reuniaun ho Prezidente Bee Timor-Leste, Empreza Públika (BTL,E.P), Carlos Peloi dos Reis, hodi ko’alia kona-ba fornesimentu bee-moos ba populasaun.

“Primeiru-Ministru fó hanoin mai ami atubele prepara planu di’ak liután hodi fornese bee-moos ba populasaun sira. Ho dezafiu barak Xefe Governu fó korrajen ba ami atu kontinua serbisu di’ak nune’e bele atinje planu ne’ebé iha,” Prezidente BTL hateten hafoin ramata reuniaun ho PM Taur, iha Palásiu Governu, kinta ne’e.

Nia dehan, daudaun BTL la uza regra hosi Ministériu Finansa, tanba ne’e presiza kria sistema foun ida hodi guia nune’e bele la’o tuir no labele kontra regra ne’ebé iha ona.

Nune’e mós iha tempu besik, BTL sei halo prosesu rekrutamentu ba kuadru sira ne’ebé sei fó apoiu fornese serbisu di’ak liután.

“Populasaun kontinua halerik ba bee-moos, ne’e hanesan dezafiu ida ba empreza públika ne’e, maibé iha tempu badak ami sei asegura sistema bee hodi la’o regularmente atu ema bele asesu ho di’ak, signifika serbisu operasaun manutensaun tenke di’ak liután. Sistema ne’ebé ladi’ak, tékniku sira sei hadi’a di’ak liután,” nia akresenta.

BTL prepara ona projetu foun bee-moos 34-resin, ne’ebé maioria iha área rurál no postu administrativu tuir kapasidade orsamentu.

Jornalista: Antónia Gusmão    

Editora: Julia Chatarina

HAKEREK NO HATÁN

Please enter your comment!
Please enter your name here