Prezidente AMTL, André Belo hamutuk ho membru-sira hala’o konferénsia imprensa iha Bidau-Toko Baru, segunda (12/04/21). Imajen Tatoli/Felicidade Ximenes.

DILI, 12 abríl 2021 (TATOLI)—Asosiasaun Médiku Timor-Leste (AMTL), husu ba líder nasionál no polítiku-sira atu fó apoiu ba serbisu médiku-sira, hodi luta kombate COVID-19 ne’ebé la’ós inventa, maibé realidade.

“Ami husu líder nasionál-sira, polítiku-sira inklui sidadaun hotu atu fó apoiu ba ami-nia serbisu tanba durante ne’e ami sakrifíka ami-nia moris no família ba serbisu ida ne’e,’’ Prezidente AMTL, André Belo hateten liu hosi konferénsia imprensa iha Bidau-Toko Baru, segunda ne’e.

Notísia relevante:Ministra Saúde husu Xanana atu fiar COVID-19

André Belo kalrifika katak, pesoál saúde hotu-hotu ne’ebé serbisu ba prevensaun COVID-19 nunka pertense ba polítika, maibé hala’o serbisu profisionál tuir profisaun.

Nia mós deklara katak, informasaun-sira ne’ebé fó-sai hosi Minsitériu Saúde (MS) kona-bá COVID-19, bazeia ba evidénsia no estudu ne’ebé iha ho nia rezutadu mai hosi Laboratóriu Nasionál Saúde (LABNAS).

“Ami hakarak infoma ba públiku kona-bá kazu ne’ebé akontese daudaun katak, kazu ne’e  konsegue halo diagnosa duni no la’ós falsu, tanba ita anunsia bazeia ba  relatóriu Laboratóriu  Nasionál Saúde,’’ nia subliña.

AMTL deklara pozisaun katak, profisionál saúde-sira mantein nafatin presta serbisu ne’ebé iha atu serbí pasiente-sira.

“Ami sei hala’o nafatin serbisu tanba ami profisonál saúde nunka hakiduk no ami husu apoiu hosi líder no komunidade tomak, nune’e ami labele lakon esperansa hodi kombate surtu ne’e,’’ Médiku ne’e deklara.

Entretantu, AMTL mós aprezenta dadus katak, ema barak iha mundu lakon vida tanba COVID-19, liuliu sira ne’ebé serbisu iha liña frente hanesan pesoál saúde-sira iha Indonézia kuaze ema na’in 500.

Jornalista: Felicidade Ximenes

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here