Lixu iha edifísiu Serbisu Autónomu Medikamentu no Ekipamentu Saúde (SAMES), hafoin inundasaun iha 04 abríl 2021.Imajen Tatoli/António Gonçalves.

DILI, 11 abríl 2021 (TATOLI)—Ministériu Administrasaun Estatál (MAE) sei halo rekrutamentu ba ema na’in 2.170 atu hamoos fo’er iha kapitál Dili.

Planu ne’e, MAE koordena ona ho Prezidente Autoridade Munisípiu Dili no mós Administradór Postu Administrativu-sira atu bele halo rekrutamentu hodi destaka iha suku hamutuk 31, ho kada suku ema na’in 70.

Notísia relevante:Governu mobiliza apoiu internasionál hatán impaktu hosi inundasaun

“Antes ne’e ita rekruta ona ema na’in-20 no destaka ona iha kada suku, maibé progresu hosi enkontru horisehik tenke aumenta tan ema na’in-50, atu hamoos lixu iha ida-idak nia suku, tanba volume lixu aumenta maka’as kauza hosi inundasaun,”  Vise-Ministru Administrasaun Estatál, Lino de Jesus Torresão, hateten ba jornalista Agência Tatoli via telefónika, domingu ne’e.

Vise-Ministru ne’e esplika, hosi ema na’in-70 ne’ebé Governu destaka ba kada suku, sei fahe ba grupu ne’ebé koordena hosi ema na’in-ida ho nia rendimentu $7 no membru-sira $5 kada loron.

“Bainhira la konsege hamoos hotu iha abríl nia-laran, ita sei prolonga tan tempu limpeza. Maibé, ema na’in-70 ne’e ita sei troka fali ho ema seluk, nune’e ema hotu bele hetan oportunidade. Ita mós la rekruta ema ne’ebé funsionáriu, maibé ema baibain ne’ebé laiha serbisu,” Vise-Ministru Lino de Jesus Torresão hateten.

Governante ne’e akresenta, limpeza iha suku laran hahú ona iha loron tolu liu-bá ho ema ne’ebé antes ne’e rekrutadu hosi autoridade suku-sira, hamutuk ema na’in-20 bazeia ba orientasaun MAE, no segunda (12/04/21), na’in-50 hamutuk sei fó tan apoiu atu kontinua halo limpeza iha ida-idak nia suku.

Jornalista: Osória Marques

Editór: Cipriano Colo

PUBLISIDADEiklan

1 KOMENTÁRIU

  1. Plano governo nian ne interesante tebes no bele ajuda ami sira nebe mak hanesan dezempregado, maibe maneira oinsa mak Ami bele aplay hodi hetan servisu refere?

HAKEREK NO HATÁN

Please enter your comment!
Please enter your name here