Pesoál aviasaun hatún hela apoiu umanitáriu hosi aviaun iha Aeroportu Internasional Nicolao Lobato, Comoro, Dili, domingu (11/04/21). Imajen Tatoli/António Gonçalves.

DILI, 11 abríl 2021 (TATOLI)—Governu Timor-Leste (TL) agradese ba Governu no povu Japonéz ne’ebé oferese apoiu umanitáriu hanesan manta hamutuk 5.000, ba vítima dezastre naturál.

Sentidu gratidaun ne’e hato’o hosi Sekretáriu Estadu Protesaun Sivíl (SEPS), Joaquim Gusmão iha serimónia asinatura termu entrega, entre Governu rua iha Aeroportu Internasionál Prezidente Nicolau Lobato, Comoro, domingu ne’e.

Notísia relevante:Japaun apoia manta 5.000 ba vítima dezastre naturál

“Agradese ba Governu Japonéz ne’ebé apoia ona TL iha situasaun defisíl, populasaun barak lakon sasan, uma hetan estragu no ema balun lakon vida,” Joaquim Gusmão agradese.

Iha fatin hanesan, enkaregadu Embaixada Japaun iha TL, Hirashima Shukasu, hateten Japaun oferese manta 5.000 nu’udár apoiu emerjénsia liu hosi JICA iha TL atu responde situasaun atuál ne’ebé maluk Timoroan-sira hasoru.

“Espera asisténsia ne’e bele hakmán vítima-sira. Japaun ativamente hola parte iha kooperasaun no koordenasaun hamutuk ho komunidade doadór no Governu TL ba esforsu asisténsia-nian,” Hirashima Shukasu hateten.

Nune’e mós, Reprezentante JICA iha TL, Goto Ko, esplika manta-sira ne’ebé transporta mai TL foti direta hosi armajén JICA iha Singapura.

Kona-bá apoiu hahán, nia informa katak, antes ne’e Japaun liu hosi ninia NGO-sira iha TL oferese uluk ona balun ba família afetadu.

Nune’e, Goto Ko deklara katak, ba oin sei serbisu hamutuk liu-tan ho Governu TL atu bele responde liu-tan nesesidade populasaun afetadu-sira.

Aviaun Tri- MG Airlines PKYGH ho tipu B737-300F ne’ebé tula manta hirak ne’e to’o iha Aeroportu Comoro, iha tuku 15:00 otl.

Bainhira aviaun ne’e to’o iha aeroportu, pesoál aviasaun-nian hatún sasan no dezinfekta kedan hodi kumpre protokolu saúde.

Sasan hirak ne’e transporta direta ba iha armajén Polísia Nasionál Timor-Leste (PNTL) iha Caicoli, Dili no tuir oráriu voo, aviaun Tri- MG Airlines PKYGH, sei fila kedan ba Indonézia, ohin.

Tuir dadus ofisiál provizóriu hosi SEPS, ho koodenasaun ministeriál ne’ebé lidera hosi Ministéiru Administrasaun Estatál (MAE), to’o domingu 11 abríl, família afetadu iha territóriu tomak iha uma-kain 4.590.

Hosi totál uma-kain ne’e, iha ema hamutuk 12.378 mak hela iha sentru evakuasaun hamutuk 43 no kazu ema lakon vida hamutuk 46.

Jornalista: Nelson de Sousa

Editór: Cipiriano Colo

PUBLISIDADEiklan

HAKEREK NO HATÁN

Please enter your comment!
Please enter your name here