Aviaun Tri-MG Airlines. Imajen/Espesiál.

DILI, 11 abríl 2021 (TATOLI)—Aviaun Tri-MG Airlines PKYGH ho númeru voo GM307, sei to’o Timor-Leste (TL) iha domingu ne’e, tula apoiu umanitáriu, hanesan manta hamutuk 5.000 ne’ebe Governu Japonéz mak oferese hodi tulun vítima dezastre naturál.

Apoiu umanitáriu hosi Governu Japonéz fó liu hosi Ajénsia Kooperasaun Internasonál Japaun-nian (JICA), iha Timor-Leste.

Notísia relevante:Inundasaun, EUA apoia rihun $100 ba TL

Informasaun ne’ebé Agência Tatoli asesu hosi parte JICA katak, tuir oráriu oras voo ne’ebé iha, loloos ne’e iha tuku 12:45 aviaun ne’e to’o ona iha Aeroportu Internasionál Prezidente Nicolau Lobato, Comoro, Dili, maibé tarde oitoan, nune’e sei to’o iha tuku 15:00.

Governu no povu Japonéz liu hosi JICA iha Timor-Leste hatudu sira-nia solidariedade ba povu TL, liu-liu iha Dili, ne’ebé sofre ba inundasaun, kauza hosi udan bo’ot ne’ebé akontese iha loron 04 fulan abríl tinan ne’e, no ema 42 lakon vida.

Tuir ajenda, manta hirak ne’e ne’e sei entrega ofisialmente hosi Reprezentante JICA iha Timor-Leste, Goto Ko, akonpaña hosi Enkaregadu Embaxada Japaun iha Timor-Leste, Hirashima Shukasu,   ba Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno ne’ebé akompaña mós hosi Sekretáriu Estadu Protesaun Sivíl (SEPS), Joaquim Gusmão.

Jornalista: Nelson de Sousa

Editór: Cipiriano Colo

PUBLISIDADEiklan

HAKEREK NO HATÁN

Please enter your comment!
Please enter your name here