DILI, 11 abríl 2021 (TATOLI)—Ekipa saúde evakua-tan pasiente pozitivu COVID-19 na’in-ida iha área Delta III, Suku Comoro, Postu Administrativu Dom Aleixo.
Reprezentante família esplika ba Agência Tatoli katak, pasiente OJ halo teste swab iha 08 abríl, atu sai hosi serka sanitária ba Munisípiu, maibé rezultadu hatudu pozitivu.
Notísia relevante:COVID-19: detetadu foun 38, kazu moderadu ida
“Ami mak halo teste swab hamutuk iha semana kotuk atu ba foho, maibé ha’u-nia tiun OJ mak pozitivu,” Família pasiente ida hateten ba Agência Tatoli, iha Delta III, domingu ne’e.
Família pesiente ne’e esplika, bainhira pesoál saúde-sira kontaktu katak OJ pozitivu, halo família trauma, maibé ikus-mai hetan esplikasaun detalla kona-bá prosesu da’et ka síklu da’et hosi virus ne’e, konsege konvense família hodi koopera atu lori duni OJ ba sala izolamentu.
“Ami koopera no ami-nia tiun ba duni izolamentu. Ami família mós sei halo teste swab dala ida tan,” Família pasiente ne’e subliña.
Entretantu, ohin Sala Situação Centro Integrado Gestão de Crise (SS-CIGC), rejista kazu foun hamutuk 38, rekoperadu hamutuk 33 no totál kazu ativu 536.
Jornalista: Natalino Costa
Editór: Cipriano Colo
