Lider Karismátiku, Kay Rala Xanana Gusmão, tun ba lagoa laran hodi ajuda tékniku sira monta bomba no lori mangeira hasai bee iha Lagoa Tasi Tolu, hodi salva komunidade sira hosi dezastre inundasaun. Imajen Tatoli/Eugénio Pereira.

DILI, 10 Abril 2021 (TATOLI)—Lider Karismátiku, Kay Rala Xanana Gusmão, ohin (sábadu, 10/04) lorokraik iha tuku 13:15, mobiliza kompañia tolu hanesan Kompañia Internasionál WIKA, Incanto Weste no Timor Port hodi monta ona bomba bee lima no mangeira hahú hasai bee iha Lagoa Tasi-Tolu ba tasi laran hodi bele salva komunidade hosi risku inundasaun.

Prosesu hasai bee ne’e bele hala’o, hafoin iha sesta (09/04), Xanana Gusmão ho lia-na’in Tasi-Tolu, Dili, hala’o serimónia rituál hodi hamoos dalan atu bele hatuur bee-dalan Lagoa Tasi-Tolu nian ho loloos.

Notísia Relevante: Xanana akompaña rituál hatuur bee-dalan Lagoa Tasi-Tolu

Eis Prezidente Repúblika, Xanana Gusmão, konsidera mezmu la hola parte iha ezekutivu maibé nu’udar lider nasionál ida iha responsabilidade morál atu salva povu nia moris hosi bee nalihun ne’ebé hoban no estraga povu nia uma no sasán.

“Importante liu maka bee ne’e menus hodi fasilita movimentu transporte bele tama ona para hodi hamenus netik sofrimentu ne’ebé ita nia povu sira hasoru,” Xanana Gusmão hateten ba jornalista sira iha Tasi-Tolu, Dili.

Iha biban ne’e, Xanana Gusmão ajuda ekipa tekniku sira halo instalasaun monta mangeira no lori bomba bee hamutuk haat tama ba iha Lagoa Tasi-Tolu ne’ebé kompostu hosi Ailalet, Maniku no Aimaria hodi hasai bee ho volume kuaze millaun tolu.

“Prosesu hasai bee ne’e sei lori tempu semana ida, hodi bele redús bee ninia volume atu labele kontinua hoban abitante sira-nia hela fatin,” Xanana Gusmão hateten.

Iha fatin hanesan, Diretór Kompañia INCANTP Weste reprezenta mós Kompañia WIKA no Timor Port, Niko Jeronimo informa, tuir sira-nia analiza kalkulasaun volume bee ne’ebé iha lagua tolu ne’e, litru millaun tolu (3) liu bele xupa ho tempu loron haat ka lima hanesan ne’e.

“Ami hakarak hateten katak bee iha lagoa laran ne’e kuaze iha litru millaun tolu liu, ne’ebé ita halo kalkulasaun loron haat ka lima tan, bee ne’e bele menus no ita-nia komunidade bele asesu ona ba estrada no bele fila ba sira-nia uma hodi hadia uma laran,” Niko Jerónimo hateten.

Imajen Tatoli/Eugénio Pereira.

Nia dehan, bomba lima ne’ebé monta bele hasai volume bee totál litru rihun 9000 kada sikulu. Parte kompañia hirak ne’ebé hola parte iha servisu ekipa ne’e agradese tebes hodi suporta Xanana Gusmão atu ajuda povu hosi risku dezastre naturál ne’ebé akontese no afeta ba povu nia moris.

Entretantu tuir obserbasaun Ajénsia Tatoli iha terrenu nota katak, Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Lere Anan Timur, hato’o agradesimentu ba Xanana bainhira observa direta esforsu Xanana nian tun iha terrenu hodi mobiliza ekipa halo servisu hasai bee iha Lagoa Tasi-Tolu ne’e, hodi salva povu nia moris.

Jornalista: Eugénio Pereira

Editór: Cancio Ximenes

HAKEREK NO HATÁN

Please enter your comment!
Please enter your name here