Lider karizmátiku Kay Rala Xanana Gusmão, akompaña serimónia ritual kultura ne’ebé lia-na’in Tasi-Tolu, Dili, selebra iha área Fatu-Banco - Bairro Maria Auxiliadora, hodi hamoos dalan atu bele hatuur bee-dalan no hamenus impaktu inundasaun, Dili 09 abríl 2021. Imajen Tatoli/Eugénio Pereira

DILI, 09 abríl 2021 (TATOLI)- Lider Karizmátiku, Kay Rala Xanana Gusmão, sesta loraik ne’e, akompaña lia-na’in sira hala’o serimónia rituál hamoos dalan atu bele hatuur bee-dalan Lagoa, Tasi-Tolu hodi bele hamenus impaktu inundasaun ba komunidade sira.

Notísia Relevante : Xanana husu Timor-oan ajuda vítima dezastre naturál

Xanana vizita komunidade afetadu dezastre naturál iha Tasi-tolu, Dili, sesta (09/04/2021). Imajen Tatoli/Eugénio Pereira

Serimónia rituál ne’e halo hosi lia-na’in Tasi-Tolu, Dili, ne’ebé halo hahú loke dalan hosu lisensa ba forsa natureza nia kbiit ho dadolin lian tokodede hodi look bua no malus, no oho bibi ida selebra kedas iha foho leten área Fatu-Banco, Bairru Maria Auxiliadora.

Abílio da Costa “Tasirade” nu’udar lia-na’in Tasi-Tolu, uma-lisan Malalu, Dili, haree iha bibi-aten hatudu sinál di’ak hodi fó lisensa atu bele supa bee sai hosi  lagoa hodi hamenus volume bee la’o tuir nia dalan.

“Sinál na’an-aten hatudu di’ak, mais sei lori tempu bele supa de’it bee sai,” Abílio da Costa “Tasirade” haktuir ba Agência Tatoli iha ámbitu serimónia ritual hatuur ba bee-dalan Lagoa Tasi-Tolu.

Rituál ne’e, alende husu lisensa ba forsa natureza, lia-na’in sira mós hamulak bei’ala tolu ne’ebé sai na’in ba Lagoa Tasi-Tolu atu hakmatek hodi labele fó risku ba komunidade sira.

“Objetivu rituál ida tan maka ita husu Avó Lafahek tolu ne’ebé mai iha Tasi-Tolu ne’e bele hakmatek hodi la bele fó risku ba nia bei-oan sira ne’ebé hela iha Lagoa nia ibun,” nia hateten.

Nia dehan, se bainhira na’in ulun sira hanoin atu lori de’it ekipamentu pezadu atu kee bee-dalan hodi loke bee fakar ba tasi, sei fó fali impaktu ba dezastre povu, tanba natureza la fó lisensa atu uza ekipamentu pezadu atu kee bee.

Iha fatin hanesan, Kay Rala Xanana Gusmão deklara nia-rasik halo vizita no observa ona situasaun hotu iha Lagoa Tasi-Tolu, tanba ne’e nia aseita hodi partisipa rituál ne’e para husu matak-malirin ba forsa natureza  no husu tulun ba Nai Maromak bele fó kbiit loke bee-dalan atu bee nalihun ne’e bele suli ba tasi.

“Ho rituál ne’ebé husu ona lisensa, aban ita sei mai para haree ekipa supa sai bee ne’e sai ba tasi, ita husu nafatin kbiit ba natureza nia intervensaun no Nai Maromak nia tulun atu hamaran lalais bee ne’e no la bele fo tan risku ba abitante sira,” Xanana hateten.

Xanana rasik koordena ona ho ekipa kompañia balun oferese ona materiál hodi bele supa sai bee  sai ba tasi laran.

Rituál ne’e rasik halo mai hosi inisiativa lia na’in no komunidade Tasi-Tolu hodi bolu Xanana marka prezensa nu’udar sasin ida hodi akompaña lala’ok rituál bele la’o tuir objetivu prinsipál hatún bee- dalan salva povu hosi risku dezastre.

Antes halo rituál, Xanana akompaña hosi komunidade atus-resin halo vizita hahú hosi Lagoa Tasi-Tolu parte foho Estatuta João Paulo II nian  to’o área Masin Lidun, hodi fó apoiu ai-han no sasán báziku hanesan, foos, ropa ba labarik, biti, kolesaun no sasán seluk tan ba vítima dezastre naturál.

Iha vizita ne’e, Xanana tama sai komunidade nia uma hodi haree direita inundasaun ne’ebé afeta ba povu nia hela fatin no fó korajen povu labele lakon esperansa hodi enfrenta situasaun krusiál ne’e.

Komunidade atus resin, hahú hosi labarik, joven feto-mane, inan ho aman sira, hobur hasoru Xanana to’o balun tanis hasoru Xanana. Iha mós akompaña hodi hakilar viva Xanana no viva Timor nia na’in.

Jornalista   : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here