Kay Rala Xanana Gusmão observa direita kondisaun uma komunidade ne’ebé mota sobu iha Aldeia Bekae, Suku Lahane Oriental, Dili. Imajen/Tatoli/Eugénio Pereira

DILI, 08 abríl 2021 (TATOLI)- Lider Karizmátiku, Kay Rala Xanana Gusmão, apela ba Timor-oan hotu atu ajuda vítima dezastre naturál iha territóriu nasionál.

Udan-anin boot no rai-halai ne’ebé akontese iha sábadu-domingu (03-04/04/2021), lori taterus ba ema ua’in iha territóriu nasionál to’o balun lakon vida no lakon sira-nia hela fatin.

Notísia Relevante : Xanana halibur Manatuto-anan apoia vítima dezastre iha Manatuto

Inan-feton, vitíma dezastre naturál tanis hako’ak Xanana . Imajen Tatoli/Eugénio Pereira

Haree ba volume estragus ne’ebé reziste boot tebes no presiza entidade hotu nia apoiu, nune’e maka Komandante Em-Xefe FALINTIL, Kay Rala Xanana Gusmão, husu atu Timor-oan hotu lolo-liman ba malu hodi hakmaan taterus sira ne’ebé abitante afetadu dezastre naturál sira enfrenta.

Dezde inundasaun udan-anin boot no rai-monu iha Dili laran, Xanana halo sakrifisiu la’o tama-sai lidun sira iha Dili laran to’o Hera hodi vizita vítima sira no haree ho matan situasaun vítima sira nian iha fatin dezastre naturál sira.

Prezensa Xanana nian iha fatin sira dezastre naturál ne’e  simu ho entuziazmu hosi vítima sira to’o balun halai hasoru ho tanis ba Xanana.

“Maun, mai de’it la lori buat ida mós ami kontente ona. Ami haree de’it o nia oin mós ami sente atu hanesan Jesus mai salva ami. Ita boot fuan osan-mean duni ba ami povu terus na’in ne’e,” inan-feton ida nu’udar vítima ba inundasaun iha Hera hateten hodi hakne’ak ba hakuak Xanana nia ain, foin lalais ne’e.

Xanana ho komunidade afetadu dezastre naturál hakuur mota hodi observa kondisaun uma komunidade nian ne’ebé hetan estragus. Imajen Tatoli/Eugénio Pereira

Tuir observasaun Agência Tatoli nian nota katak iha vizita Xanana nian tama-sai bairru no fatin sira afetadu dezastre ne’e simu ho basa-liman, haklalak, kontenti hodi viva Xanana. Mezmu sira enfrenta hela situasaun difisil iha udan-been laran no tahu-laran.

Maioria hosi inan-feton, labarik no juventude sira aproveita Xanana nia prezensa ne’e hodi husu hasai foto no halo video hanesan rekordasaun ida ba sira.

Área sira ka fatin sira  sofre liu inundasaun ne’ebé Xanana ba maka hanesan, Hera,  Becora, Lahane Oriental (Aldeia Becae ho Aitahan Belar),  Lahane Paiol, Taibesi (Aituri-Laran),  Tuana-Laran, Canossa, Maneluana (Lesbutak) no  fatin seluk tan.

Iha vizita, kinta (08/04), Xanana la’o-ain ho kalsa badak hasan direita kaixa iha nia kabas hodi lori apoiu nesesidade báziku  hodi hakat liu mota-laran no tahu-boot akompaña ho rai udan maka’as ba ajuda vítima sira  iha Aldeia Lisbutak, Manleana.

Xanana Gusmão mós enkoraja nafatin populasaun no vítima sira atu labele lakon esperansa durante enfrenta situasaun difisil ida ne’e.

Iha ne’e fatin refere, abitante barak maka afetadu, aléinde lakon uma, sasán uma laran mós la aproveita totál, inklui estrada diresaun Manleuana-Aileu kotu totál no rai taka estrada no uma komunidade nian ida.

Xanana mós dada-lia ho povu hodi rona direita sira-nia taterus ne’ebé aprezenta ho tanis. Nune’e, Xanana kontinua hakuak hodi hamaran sira-nia matawan no buka kontaktu Timor-oan sira ne’ebé iha kbiit bele ajuda vítima sira ne’e.

Durante rona povu nia preokupasaun, Xanana ho inisiativa buka kontaktu emprezáriu Timor-oan sira ne’ebé iha kbiit atu ajuda lori ekipa pezadu  ba ajuda halo intervensaun hodi normaliza  bee-dalan ne’ebé lori risku ba vida umana.

“Ha’u husu ba Timoroan sira no emprezáriu sira ajuda malu no ajuda ita nia maun-alin, inan-feton vítima dezastre naturál sira,” Xanana hateten ba jornalista sira iha ámbitu nia vizita ba haree kondisaun vítima dezastre naturál iha Aldeia Lisbutak, Maneluana, Dili.

Diretór Kompañia Montana Di’ak, Lay Fu Seng informa ajuda ne’ebé sira kontribui hodi koloka ekipamentu pezadu suru rai-henek ho fo’er ne’ebé itaka-metin iha ponte Hera, Aldea Mota Kiik-, Taibesi Aituri-Laran nu’udar asaun solidaridade hodi tulun povu hosi risku dezastre.

Nia dehan, sira-nia parte sei esforsu hodi suru-sai rai-henek hodi loke moda dalan, inklui aterra fila fali rai-henek ba estrada sira ne’ebé mota sobu hodi hadi’a fila fali asesu estrada ho di’ak.

Iha sorin seluk, Jestor Kompañia Jonize, Carlito Rotriques dehan, sira-nia parte mós koloka ona ekipamentu pezadu rua hodi suru rai-henek iha área mota Tuana-Laran inklui ajuda Governu koloka ekipamentu hamoos no suru-sai tahu-nurak no fo’er iha área Comoro nian.

Emprezáriu Timor-oan, Raul Lemos lori nia kompañia Atramor&RayaTex ajuda mós abitante-sira vítima dezastre naturál ne’ebé maka evakua ba João Paulo II, Tasi-Tolu, Dili.

Aleinde ne’e, iha loron 06  abríl 2021, Raul Lemos,  lori nia família rasik nia naran ho nia empreza Atramor&RayaTax, entrega  mós apoiu nesesidade báziku liuhosi Sekretária Estadu Protesaun Sivíl (SEPS) hodi bele tulun komunidade  afetadu dezastre naturál iha territóriu nasionál.

Apoiu ne’e, Krisdayanti, Diva Pop Indonézia nia marido ne’e entrega diretamente ba Sekretáriu Estadu SEPS, Joaquim Gusmão, iha edifísiu SEPS, Caicoli, Dili.

Jornalista   : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here