Embaixadór EUA iha Timor-Leste, Kevin Blackstone entrega apoiu umanitária ba vítima dezastre naturál. Imajen Tatoli/Nelson de Sousa

DILI, 09 abríl 2021 (TATOLI)-Komunidade hosi Aldeia 01, Suku Maskarinhas, Postu Administrativu Nain Feto, Munisípiu Dili, Domingos Verdial, hato’o agradesimentu ba povu Estadu Unidu Amerika (EUA) ne’ebé fó apoiu umanitária mai vítima dezastre naturál iha Timor-Leste.

Notísia Relevante : Inundasaun, EUA apoia rihun $100 ba TL

Domingos Verdial ho família nu’udar vítima dezastre naturál ne’ebé evakua hosi sira-nia uma mai iha Eskola Ensinu Sekundáriu Jerál 4 Setembru, UNAMET, Balide, Dili, bainhira sira-nia uma bee tama no rai monu iha dezastre naturál, iha loron 04 abríl 2021.

Estadu Unidu Amérika (EUA), sesta ne’e, liuhosi Ajénsia Internasionál ba Dezenvolvimentu Estadu Unidu-nian (USAID) oferese $100,000.00 mai Governu Timor-Leste atu bele tulun vítima dezastre natural iha territóriu nasionál.

Domingos Verdial. Imajen Tatoli/Nelson de Sousa

“Nu’udar Timor-oan sente kontente no orgullu hato’o agradese ba apoiu ne’ebé povu Amerika fó  mai ami povu Timor-Leste,” Domingos Verdial hateten ba Agência Tatoli hafoin simu apoiu nesesidade báziku hosi EUA iha sentru evakuasaun Eskola Ensinu Sekundáriu Jerál 4 Setembru UNAMET, Balide, Dili.

Nia hateten, dezastre naturál ne’ebé akontese iha territóriu Timor-Leste lori taterus boot to’o Timor-oan liu 20 maka lakon vida.

Sekretáriu Estadu Protesaun Sivíl (SEPS),Joaquin Gusmão, ne’ebé simu apoiu  fundu hosi EUA  esklarese katak, fundu ne’e la’ós fó diretamente ba Governu Timor-Leste liuhosi Protesaun Sivíl maibé fó ba iha Internasionál Organizasaun Migrasaun (IOM-sigla inglés) mak jere hodi hola sasán nesesidade báziku hanesan hahán no la’ós hahán atu bele ajuda vítima dezastre naturál iha Timor-Leste.

Liuhosi fundu ne’e, EUA fó ona apoiu nesesidade báziku ba família uma-kain 60 ho totál ema 330 ne’ebé daudaun evakua ba iha sentru evakuasaun iha Eskola Ensinu Sekundáriu Jerál 4 Setembru, UNAMET, Balide, Dili.

Jornalista       : Nelson de Sousa

Editór             : Francisco Simões

 

 

HAKEREK NO HATÁN

Please enter your comment!
Please enter your name here