Arsebispu Arkidioseze Metropolitana Dili, Don Virgílio do Carmo da Silva, SDB. Imajen Tatoli/ Egas Cristóvão.

DILI, 09 abríl 2021 (TATOLI)—Arsebispu Arkidioseze Metropolitana Dili, Don Virgílio do Carmo da Silva, ohin, simu osan $26.600 hosi Madre Superiora Kongregasaun Salesiana Don Bosco Balide, Angelita Gomes, FMA (Filhas de Maria Auxiliadora), ne’ebé halibur hosi traballadór timoroan sira iha Austrália ne’ebé organiza-aan iha Grupu Lolo Liman Fuan Ba Timor (GLLFT).

Notísia Relevante: Grupu Lolo Liman Fuan Ba Timor entrega $26.600 ba Arsebispu Dili

Don Virgílio do Carmo da Silva hateten, timoroan sira-ne’ebé servisu iha Austrália halibur duni sira-nia kosar been haruka mai liuhosi Kongregasaun Filhas de Maria Auxiliadora (FMA), ne’ebé ohin entrega ba Dioseze Dili atu fó tulun ba vítima dezastre naturál ne’ebé daudaun ne’e sai refujiadu iha sentru evakuasaun sira.

“Traballadór timoroan nia osan ne’ebé ohin lori mai entrega iha Dioseze Dili ne’e, ami sei aloka liuhosi komunidade relijioza pároku sira-ne’ebé iha Dili laran nomós iha munisípiu ne’ebé daudaun ne’e hala’o atendimentu no fó tulun ba ita-nia vítima dezastre naturál sira-ne’e,” Don Virgílio do Carmo da Silva hateten ba jornalista sira iha Cámara Eclesiástica, Lecidere, Dili.

Don Virgílio hatutan, osan hirak ne’ebé ohin simu sei fó uitoan ba Conferéncia Episcopal Timorense (CET) tanba durante ne’e CET hamutuk ho Dioseze Dili tau matan no haree ba vítima dezastre naturál sira-ne’ebé evakua no refujia iha sentru evakuasaun sira iha Dili.

“Durante situasaun dezastre naturál nia laran ne’e, hosi CET no mós Dioseze Dili apoiu liuliu fó ai-han no tein hahan ba vítima sira to’o hori kalan. Tanba, hanesan fatin sira ne’ebé daudaun vítima inundasaun sira hela bá, hahú hosi Hera nian ba to’o Comoro, entaun ita sei haree ida-ne’e. Maibé, ha’u hanoin tuir mai la’ós ho hahan de’it ona maibé ho sasán balu hanesan bikan, kanuru, sana, biti no manta, tanba ha’u haree sira balu hahú hakarak fila ona ba sira-nia hela fatin,” Don Virgílio hateten.

Osan ne’ebé ohin simu ona, Don Virgílio hateten, aban ka bainrua sei kontaktu ho Komunidade relijioza no pároku sira-ne’ebé daudaun ne’e hala’o atendimentu ba vítima sira, bele hahú apoiu ona osan ne’ebé traballadór timoroan sira haruka mai liuhosi FMA ne’e.

Iha biban ida-ne’e, Don Virgílio do Carmo da Silva lori Dioseze Dili nia naran hato’o agradese ua’in ba traballadór timoroan sira-ne’ebé servisu iha Austrália tanba sira-iha interese no iha fuan ba Timor-Leste hodi ajuda timoroan sira-ne’ebé oras ne’e daudaun hetan terus. 

“Loos duni. Sira ba servsiu hatene katak la’ós fasil maibé sira la hanoin de’it sira-nia família maibé hanoin mós ba timoroan hotu liuliu iha susar ida-ne’e, sira mós kria Grupu Lolo Liman Fuan Ba Timor ne’e hatudu katak todan, terus, no susar ne’ebé ita hasoru agora sira mós lolo-liman atu hakmaan ita-nia terus iha tempu susar ida-ne’e. Entaun ita fó agradese no obrigada barak ba sira,” bispu ne’e dehan.

Osan ne’ebé atu apoiu ba vítima sira-ne’e, nia dehan, sei depende ba iha nesesidade hanesan sentru evakuasaun sira-ne’ebé mak akumula vítima dezastre naturál barak liu, osan mós sei fó tuir bazea ba kuantidade ema-nian.

Jornalista: Arminda Fonseca

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here