Reprezentante Grupu Lolo-liman Fuan Ba Timor (GLLFT), Madre Superiora Kongregasaun Salesiana Don Bosco Balide, Angelita Gomes, FMA, entrega osan montante $26.600 ba Dioseze Dili liuhosi Arsebispu Arkidioseze Metropolitana Dili, Don Virgílio do Carmo da Silva. Imajen TATOLI/Arminda Fonseca.

DILI, 09 abril 2021 (TATOLI)—Grupu Lolo Liman Fuan ba Timor (GLLFT) ne’ebé inisiativa harii hosi traballadór timoroan sira-ne’ebé servisu iha Austrália, sesta ne’e, entrega osan montante $26.600 ba Dioseze Dili liuhosi Arsebispu Arkidioseze Metropolitana Dili, Don Virgílio do Carmo da Silva, iha Cámara Eclesiástica Lecidere, Dili.

Reprezentante Grupu Lolo-liman Fuan Ba Timor (GLLFT) iha Timor-Leste, Madre Superiora Kongregasaun Salesiana Don Bosco Balide, Angelita Gomes, FMA (Filhas de Maria Auxiliadora), hateten objetivu timoroan sira apoiu ba vítima inundasaun ne’e tanba bainhira sira rona no haree iha mídia sosiál katak Timor-Leste enfrenta terus boot no presiza duni ema hotu nia tulun.

“Sira fó apoiu osan ba vítima inundasaun tanba bainhira sira rona no haree situasaun Timor nian, sira mós sente no hola parte hotu terus ne’ebé ita hasoru. Nune’e, sira halibur malu kria Grupu Lolo Liman Fuan Ba Timor hodi kontribui osan haruka mai ho montante $26.600 liuhosi ha’u no ohin ha’u entrega ba Dioseze Dili,” Madre Angelita Gomes, FMA, hateten ba jornalista sira hafoin entrega osan ba Don Virgílio do Carmo da Silva.

Madre Angelita Gomes hatutan, osan ne’ebé sira haruka mai ne’e parte dahuluk to’o ona iha Timor iha kuarta (07/04/) lorokraik ho osan valór $20,000 no iha kinta (08/04) lorokraik, sira manda tan osan $15,000 entaun totál hamutuk $35,000 X 0.76 dollar Australia ($AU). Ohin, sesta-feira (09/04) iha tuku 11 dadeer foti iha Timor-Leste totál orsamentu hamutuk $26.600.

Madre FMA ne’e hatutan, timoroan sira-ne’ebé apoiu osan ba vítima inundasaun liuhosi Kongregasaun Filha de Maria Auxiliadora (FMA) tanba traballadór timoroan sira iha Austrália entre sira ne’e ida uluk tama Juventude Dioseze Dili nian, entaun hosi ne’e mak manda osan mai Kongregasaun FMA ne’e.

“Antes ne’e ita-nia traballadór sira hakarak haruka osan mai, ami mak atu distribui ba vítima sira. Maibé, ami haree ba katak osan ne’ebé sira haruka mai ne’e montante boot, entaun ami deside katak di’akliu ami fó ba amu bispu mak iha kompeténsia distribui ba vítima inundasaun sira-ne’e,” Madre ne’e hateten.

Osan ne’ebé traballadór timoroan sira haruka mai ne’e, nia dehan, antes ne’e traballadór timoroan sira husu imajen no video kona-ba inundasaun ne’ebé akontese entaun haruka ba sira, no sira mós haree tiha imajen no vídeo ne’e involve mós sira-nia patraun sira iha servisu fatin, fó apoiu hotu osan uitoan tau hamutuk mak haruka mai Timor-Leste.

“Ha’u hanoin asaun ida-ne’e furak no signifikativu tanba maske sira ba servisu nu’udár iha toos maibé lahaluha ajuda nafatin solidaridade fuan ba Timor. Tanba, atu informa de’it inisiativa Grupu Lolo Liman ida-ne’e iniasiativu rasik ho fuan hosi traballadór timoroan iha Austrália laran tomak. Tanba, sira lakohi fuan Timor nian sente tanis mesak,” nia hatutan.

Entaun, nia dehan, bainhira Timor-Leste akontese dezastre naturál, momentu ne’ebá kedas, timoroan sira kria grupu WhatsApp (WA) ida no grupu naran Lolo Liman Ba Fuan Timor.

“Kria Grupo ne’e ideia hosi kolega sira iha Parte Queensland, Brisbane, Caboolture mak fó ideia kria grupu ida hodi akomula kolega sira hotu parte Queensland. Entaun, sira telfone direta fali ho sira-nia kolega sira iha Victoria área Mildura, Robinvale, Stanthorpe, Albany Mareeba, Melbourne, Sydney, Griffith, Warrnambool, Darwin, Tasmanya, Warburton, Adelaide no fatin seluk tan,” nia haktuir.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here