Serimónia entrega nesesidade bázika entre Ministru Ensinu Superiór, Siénsia no Kultura (MESSK), Longuinhos dos Santos, ho Padre Antonius Ato, SVD. Imajen/Média MESSK.

DILI, 9 abríl 2021 (TATOLI)—Ministru Ensinu Superiór, Siénsia no Kultura (MESSK), Longuinhos dos Santos, hamutuk funsionáriu oferese nesesidade bázika ba vítima inundasaun ne’ebé oras ne’e refujia iha salaun Parokiál, Parókia São Tiago, Hera.

“Lori naran pesoál no família boot Ministériu Ensinu Superiór, Siénsia no Kultura, hato’o sentidu solidariedade ba komunidade afetadu inundasaun ne’ebé refujia iha Igreja Hera,” Longuinhos hato’o iha serimónia entrega, sesta ne’e.

Notísia relevante:Governu presiza millaun $200 responde dezastre naturál

Ministru ne’e esplika, MESSK oferese nesesidade bázika ne’e tanba kontribuisaun mai hosi Gabinete Ministru, Asesór, dirijente no funsionáriu-sira.

“Apoiu ne’e kontribuisaun  pesoál mai hosi funsionáriu ne’ebé serbisu iha MESSK mak tau osan hamutuk, hodi bele hola sasan sira-ne’e,” Longuinhos subliña.

Iha fatin hanesan, Vigáriu Parokiál, Padre Gabriel Suban Koten, SVD, agradese ba kontribuisaun hosi MESSK, tanba bele manifesta solidariedade forte ba povu afetadu ne’ebé mak hetan mahon iha Igreja ne’e.

“Ami agradese ba solidariedade ne’e. Dezastre naturál fanun ema hotu hamrik, hodi tulun ita-nia komunidade,” Nai lulik ne’e agradese.

Tuir dadus ne’ebé iha, komunidade ne’ebé hamahan an iha Parókia Hera, hamutuk família 124, no horisehik iha família uma-ka’in neen mak fila ona ba idaidak-nia hela fatin.

Entretantu, sasan nesesidade bázika ne’ebé MESSK oferese mak hanesan, fos, mina, água, biscuit, susu been no super mie.

Tuir dadus provizóriu hosi Sekretáriu Estadu Protesaun Sivíl (SEPS),  to’o kuarta 07 abríl, iha ema na’in-42 mak lakon vida hosi dezastre naturál iha territóriu nasionál.

SEPS mós halo ona aprezentasaun iha reuniaun Konsellu Ministru kona-bá pontu situasaun impaktu hosi inundasaun ne’ebé provoka hosi siklone tropikál Seroja katak, levantamentu ba dadus, rejista ona ema hamutuk 10.000 mak lakon uma iha Dili.

Iha 08 abríl, Konsellu Ministru (KM) deside mós hodi aprova mobilizasaun apoiu internasionál atu hatán ba impaktu inundasaun ne’ebé akontese iha loron 04 abríl.

Ohin, VIII Governu Konstitusionál lideradu hosi Primeiru-Ministru (PM), Taur Matan Ruak, informa ba Parlamentu Nasionál katak, ezekutivu presiza orsamentu ho montante millaun $200 hodi responde ba dezastre naturál iha territóriu nasionál.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here